Бу ҳақда мудофаа вазири генерал-лейтенант Шуҳрат Холмуҳаммедов «Ўзбекистон 24» телеканалига берган интервьюсида маълум қилди.
Президент Шавкат Мирзиёев ҳаво ҳужумидан мудофаа тизимлари, юқори аниқликдаги қуроллар ҳамда ҳарбий ҳаво кучларини самарали қўллашни янада такомиллаштиришга қаратилган муҳим фармонни имзолади.
Ҳужжатга мувофиқ, замонавий рақамлаштирилган бошқарув тизимига эга Қуролли Кучлар Ҳарбий ҳаво кучлари жанговар қўмондонлиги ташкил этилади. Шунингдек, юқори аниқликдаги қуроллар билан жиҳозланган авиация техникалари ва янги бўлинмаларни шакллантириш орқали ҳарбий ҳаво кучларининг жанговар салоҳиятини ошириш бўйича чора-тадбирлар белгиланган.
Таъкидланишича, мазкур фармон ҳарбий авиация ва ҳаво ҳужумидан мудофаа бўлинмаларининг жанговар имкониятларини сезиларли даражада кучайтириш, муҳим ва стратегик объектларни ҳаводан бўлиши мумкин бўлган таҳдидлардан ҳимоя қилиш самарадорлигини оширишга хизмат қилади.
Шунингдек, давлат раҳбари Ўзбекистон ва Туркия ҳукуматлари ўртасида ҳарбий тиббиёт соҳасида ҳамкорликни ривожлантиришга қаратилган битимни тасдиқлаш тўғрисидаги қарорни ҳам имзолади. Битим доирасида стоматология, фармацевтика, даволаш иши ва бошқа қатор тиббий йўналишларда мутахассислар тайёрлаш, малака ошириш, тажриба алмашиш ҳамда беморларни даволаш бўйича ҳамкорлик йўлга қўйилади.
Тақдимотда мудофаа ишлари органлари фаолиятига «ноль бюрократия» тамойилини жорий этиш масалалари ҳам кўриб чиқилди. Хусусан, 16 ёшга тўлган ва ID-карта олган ўғил болаларни автоматик тарзда ҳарбий ҳисобга қўйиш, тиббий комиссияларни рақамлаштириш ва тиббий кўрикларни туман ҳамда шаҳар марказий поликлиникаларида ўтказиш бўйича таклифлар маъқулланди.
Бундан ташқари, ҳарбий хизматчилар ва мудофаа ишлари органлари фуқаро ходимларининг ижтимоий ҳимоясини кучайтириш чоралари белгиланди. Жумладан, Тошкент ва Самарқанд шаҳарларида хизмат қилаётган ҳарбий хизматчилар учун турар жой ижараси бўйича пул компенсацияси 25 фоизга оширилди. Мудофаа ишлари органлари фуқаро ходимларининг иш ҳақи эса жорий йил 1 июлдан 20 фоизга, 2027 йил 1 январдан яна 50 фоизга оширилади.
Тақдимот якунида Олий Бош қўмондон қўшинларнинг жанговар шайлиги ва тайёргарлигини ошириш, илғор тажрибаларни жорий этиш, ҳарбий таълим тизимини ислоҳ қилиш ҳамда ҳарбий хизматчиларни касбий тайёрлаш бўйича устувор вазифаларни белгилаб берди.
