Бу ҳақда Президент администрацияси раҳбари Саида Мирзиёева маълум қилди.

Унинг таъкидлашича, юздан ортиқ компания вакиллари иштирокида инвестиция киритиш, бизнесни ривожлантириш ҳамда қўшма лойиҳаларни амалга ошириш имкониятлари муҳокама қилинган.

«Мазкур Кенгашнинг ташкил этилиши мамлакатларимиз ўртасидаги шериклик истиқболларига кенг йўл очмоқда. Бу юксак ишонч учун Президентимизга самимий миннатдорлик билдираман», — деб ёзди Саида Мирзиёева.

У шунингдек, ташаббусни қўллаб-қувватлагани, Ўзбекистонга эътибор қаратаётгани ва ҳамкорликни кенгайтиришга тайёрлиги учун Марко Рубио, унинг рафиқаси Жанетт хоним ҳамда Серджио Горга алоҳида миннатдорлик билдирган.

Саида Мирзиёеванинг қайд этишича, энди асосий вазифа эришилган келишувларни аниқ амалий натижаларга — инвестициялар, замонавий корхоналар ва янги иш ўринларига айлантиришдан иборат.

«АҚШ билан ҳамкорликни ривожлантиришдан кўзлаган мақсадимиз ҳам шу», — дея таъкидлаган Президент администрацияси раҳбари.