Серқирра ижодкор Ёзувчилар, Театр арбоблари ва Журналистлар уюшмалари аъзоси. Бугунги кунда ижодини педагогик фаолият билан уйғунлаштирган ҳолда давом эттириб келмоқда. Назария ва амалиёт устози сифатида Ўзбекистон Давлат санъат ва маданият институтида ёшларни киношунослик сирларидан баҳраманд қилмоқда.
Санъатшунослик ва маданиятшунослик соҳасининг билимдони Ашурали Жўраевнинг ўнлаб ўткир публицистик мақолалари, суҳбат ва эсселари матбуот саҳифаларида эълон қилинган. Кино, театр, қўшиқчилик, мусиқа санъати муаммоларига оид таҳлилий мақолалари, телекўрсатувлари кўп марта баҳс-мунозараларга асос бўлган.
Тадбир иштирокчилари устоз ижодкорнинг миллий журналистика ривожига қўшган ҳиссаси, унинг мақола ва бадиий асарларида талқин этилган ҳаёт ҳақиқатлари, жамиятда ёш авлодни тарбиялашдаги фаол иштироки ҳақида сўз юритдилар.
– Ашурали Жўраев – моҳир публицист, – иқтисодиёт фанлари доктори, профессор Муҳиддин Калонов. – Унинг матуотда эълон қилинган мақолалари, китобларида даврнинг муҳим масалалари ўз ифодасини топган ва ўқувчилар эътиборини қозонган. Адиб 1983–1996 йилларда “Ўзбекистон адабиёти ва санъати” газетасида бўлим мудири лавозимида ишлади. Газетада унинг ўша даврдаги экологик фожиалар ҳақидаги кўплаб мақолалари эълон қилинди. Айниқса, унинг ўзбек театри, кино ва мусиқа санъати ҳақида ёзган мақола ва очерклари, танқидий чиқишлари ва суҳбатлари мутахассислар томонидан эътироф этилиб, ўқувчилар тилига тушди.
Тадбир якунида адиб ўзининг ижод маҳсули бўлмиш бир нечта китобини Алишер Навоий номидаги Ўзбекистон Миллий кутубхонасига хадя этди.
***
Маълумот учун: Ашурали Жўраев 1956 йил 8 августда Кармана тумани, Жалойир қишлоғида туғилган. 1983-1996 йиллари “Ўзбекистон адабиёти ва санъати” газетасида ходим, санъат бўлими мудири, 1997-2007 йилларда “Муштум”, 2007-2013 йилларда “Гулхан” журналларида бош муҳаррир, 2013-2017 йиллари “Ўзбекистон” НМИУ директори биринчи ўринбосари лавозимларида фаолият юритган.
“Тошбақалар пойгаси” (1986 й.), “Юрак бўронлари” (1989 й.), “Ўқ узган ким?” (1994 й.), “Сенга кўнгил берсам” (1999 й.), “Дил гавҳари” (2001 й.), “Танимадинг-а?” (2005 й.), “Саҳифага сиғмаган сатрлар” (2008 й.), “Майсалар уйғонган тонг” (2010 й.), “Эсар Жайҳун шамоллари” (2014), “Юракдаги овоз”, “Конверт одам” (2015 й.), “Уйғониш замонаси муборак бўлсин” (2020 й.), “Виждон қўнғироғи” (2021 й.) китоблари муаллифи.
Ўз мухбиримиз.