Тошкент шаҳрида Йўл ҳаракатини ташкил этиш марказининг маълум қилишича, ҳар куни бозорнинг Янги Сергели кўчасига туташ кириш-чиқиш нуқталаридан 1 500 дан ортиқ автомобиль фойдаланади. Бу эса мазкур ҳудудда транспорт оқими ошиши ва тирбандликлар юзага келишига сабаб бўлиб келган.
Муаммони ҳал этиш мақсадида ЙҲТЕМ томонидан бозор ҳудудида ҳаракатни ташкил этишнинг янги схемаси жорий этилмоқда. Лойиҳа доирасида бозор бўйлаб қўшимча локал йўл қурилмоқда.
Янги тартибга кўра, бозорга келаётган автомобиллар асосий оқимни банд қилмасдан локал йўл орқали ҳудудга кириши мумкин бўлади. Шунингдек, бозордан чиқаётган транспорт воситалари ҳам аввал локал йўлга чиқиб, кейин асосий йўл ҳаракатига қўшилади.
Мутахассислар фикрича, мазкур ечим Янги Сергели кўчасидаги юкламани камайтириш, кескин тормоз бериш ва бурилиш ҳаракатларини қисқартириш ҳамда ҳаракат хавфсизлигини оширишга хизмат қилади.
Бундан ташқари, янги йўл бўйлаб пиёдалар ва велосипедчилар учун алоҳида инфратузилма яратилмоқда. Бу бозорга келувчи харидорлар, ишчилар, маҳалла аҳолиси ҳамда жамоат транспорти йўловчилари учун қўшимча қулайликлар яратади.
Бозор ҳудудидаги автотураргоҳларни тартибга солиш ишлари ҳам олиб борилмоқда. Хусусан, 2 мингдан ортиқ автомобиль жойига мўлжалланган йўл чизиқлари чизилган. Бу ҳудуддан самарали фойдаланиш, тартибсиз тўхтаб туриш ҳолатларини камайтириш ва ички ҳаракатни хавфсиз ташкил этиш имконини беради.
ЙҲТЕМ маълумотига кўра, янги ечим транспорт оқимини тартибга солиш, тирбандликларни камайтириш, жамоат транспорти ҳаракати самарадорлигини ошириш ҳамда пиёдалар учун хавфсиз шароит яратишга хизмат қилади.
