Билим ва малакаларни баҳолаш агентлигининг мазкур масала юзасидан маълум қилишича, сертификат имтиҳонларига ташкилий жиҳатдан сифатли ва бенуқсон тайёргарлик кўриш, имтиҳонларни адолатли ва шаффоф ўтказиш, талабгорлар учун етарли шарт-шароит яратиш ҳамда натижаларни белгиланган муддатларда эълон қилиш мақсадида Вазирлар Маҳкамасининг 2026 йил 29 июлдаги 411-сон қарори билан «Умумтаълим фанларини билиш даражасини аниқлаш ва сертификат бериш тартиби тўғрисида»ги Низомга тегишли ўзгартириш ва қўшимчалар киритилган.
Мазкур ўзгартиришларга мувофиқ, тест синовларини ўтказиш жойлари, муайян ҳудудлар бўйича ўтириш ўринлари сони ҳамда имтиҳон саналарини белгилаш тартиби белгиланган.
Шундан келиб чиқиб, 2026 йилнинг иккинчи ярми учун қуйидаги миқдорда ўтириш ўринлари ажратилган:
сентябрь ойида — 125 753 та;
октябрь ойида — 129 535 та;
ноябрь ойида — 112 335 та;
декабрь ойида — 128 680 та.
Жами 496 303 та ўтириш ўрни белгиланган.
Шу билан бирга, миллий сертификат имтиҳонларини ўтказиш даврийлиги ҳам оширилмоқда. Хусусан, 2026 йил сентябрь–декабрь ойларида математика, кимё, география, биология, физика, она тили ва адабиёт ҳамда тарих фанларидан 2 мартадан, ҳуқуқшунослик фанидан 1 марта, жами 15 та имтиҳон ўтказилиши режалаштирилган.
Таққослаш учун, 2025 йилнинг сентябрь–декабрь ойларида жами 11 та имтиҳон ўтказилган бўлиб, уларда 255 217 нафар талабгор иштирок этган.
Таъкидланишича, ҳудудлар кесимида ўтириш ўринларини белгилаш талабгорларнинг имтиҳонда иштирок этишини чеклаш, тўловларни камайтириш ёки юқори натижа кўрсатиши мумкин бўлган талабгорлар сонини сунъий равишда қисқартириш мақсадини кўзламайди.
Мазкур тартибнинг асосий мақсади мавжуд инфратузилма, техник воситалар, ходимлар ва назорат ресурсларидан оқилона фойдаланган ҳолда имтиҳонларни барқарор ва сифатли ташкил этиш, ҳудудлар бўйича юкламани мақбул тақсимлаш ҳамда натижаларни белгиланган муддатларда эълон қилишни таъминлашдан иборат.
