Вазирнинг таъкидлашича, ушбу хабарни тарқатган «Butterfly team» гуруҳи ҳам ўз мақсади орқали айнан киберхавфсизлик масаласига эътибор қаратиш бўлганини билдирган.
«Ҳозир тарқалмади дегани, зудлик билан чоралар кўрилмаса, эртага бундай ҳолат бўлмаслигига кафолат дегани эмас», — деб ёзди Шерзод Шерматов.
Унинг қайд этишича, сунъий интеллект эски ахборот тизимларидаги заифликларни аниқлаш имкониятларини сезиларли даражада оширмоқда. Шу сабабли давлат, нодавлат ва тижорат ташкилотлари ўз тизимларидаги камчиликларни мунтазам аниқлаб, ўз вақтида бартараф этиб бориши зарур.
Вазир халқаро миқёсдаги киберхавфсизлик таҳдидларига мисол сифатида Binance криптовалюта биржасидан 6 миллиард доллардан ортиқ маблағ ўғирлангани ҳақидаги маълумотни ҳам келтирди.
Шерзод Шерматов киберхавфсизликка қўшимча маблағ йўналтириш ва бу соҳада малакали мутахассислар тайёрлаш муҳимлигини таъкидлади. Унинг фикрича, сунъий интеллектни ривожлантиришга сармоя киритилаётган бир пайтда рақамли тизимларни ҳимоя қилишга ҳам шунга мос эътибор қаратилиши керак.
Вазир киберхавфсизлик соҳасида билим олишни истаган ёшларга ҳам мурожаат қилди. Ушбу йўналишда мутахассисларга Ўзбекистонда ҳам, хорижда ҳам талаб ортиб боришини таъкидлаб, Cyber University, ТАТУ, INHA, Amity ва Acharya университетларидаги киберхавфсизлик таълим йўналишларига эътибор қаратишни тавсия этди.
Вазирнинг фикрича, рақамлаштириш ва сунъий интеллект ривожланиши билан бирга киберхавфсизликка бўлган эҳтиёж ҳам ортиб боради.
