Яқинда давлатимиз раҳбари раислигида жисмоний тарбия ва спорт соҳасига бағишлаб ўтказилган видеоселектор йиғилиши ҳам айнан шу мақсадга — соҳани янги босқичга олиб чиқиш, оммавий спортни халқимизнинг кундалик ҳаёт тарзига айлантириш ҳамда селекция тизимини тубдан ислоҳ қилишга қаратилгани билан ғоят аҳамиятлидир.

Шу пайтгача спортга жалб этилганлар сони кўпинча ҳисоботлардаги қуруқ рақамлар ёки умумий қамров фоизлари билан ўлчанар эди. Эндиликда бундай амалиётдан воз кечилиб, аҳолининг реал соғлиғи ва жисмоний кўрсаткичлари асосий баҳолаш мезони сифатида белгиланди. Йиғилишда спорт тўгараклари фаолиятидаги хўжакўрсинлик ва формал ёндашувлар кескин танқид қилиниб, барча ҳаракатларни фақат ва фақат амалий натижага йўналтириш қатъий талаб қилиб қўйилди.

Айниқса, олий таълим муассасаларида бу борадаги ишлар аҳволи ҳаққоний таҳлил қилинди. Очиқ тан олиш керакки, талаба ёшларни спортга жалб этишда ҳали ечимини кутаётган масалалар етарли. Энди олийгоҳлар спорт федерациялари билан яқиндан ҳамкорлик қилиши, иқтидорли ёшларни аниқлаб, уларни тайёрлашнинг мутлақо янгича ва шаффоф тизимини яратиши устувор вазифа сифатида белгиланди.

Бу борада давлатимиз раҳбари томонидан қатор ҳаётий ташаббуслар илгари сурилди. Маҳаллаларда “соғлом ҳаёт волонтёрлари” тизими жорий этилиши, ҳудудларнинг спортдаги фаоллиги уларнинг рағбатлантирилишига асос бўлиши шулар жумласидан. Бундан ташқари, барча таълим даргоҳларида ҳафтанинг бир куни “Спорт куни” деб эълон қилиниши, ёшлар ўртасида кросс-фит каби замонавий ва оммабоп машғулотларни кенг ёйиш орқали ҳақиқий соғлом турмуш тарзини тарғиб қилиш вазифаси юклатилди.

Шу ўринда “маҳалла — мактаб — спорт муассасаси — федерация” узлуксиз занжирининг аҳамияти беқиёс. Талабаларни спорт тўгаракларига жалб этиш орқали дуал таълим асосида мураббийлар тайёрлаш ва уларга қўшимча имкониятлар яратиш тизими йўлга қў­йилади. Соҳага фақатгина жисмоний машғулот сифатида эмас, балки илмий ёндашув, сунъий интеллект технологияларини жорий этиш ва иқтисодий самарадорлик нуқтаи назаридан ҳам қараш вақти келди.

Ушбу устувор вазифалардан келиб чиқиб, Наманган давлат техника университетида спорт йўналишидаги ишлар мутлақо янгича тизим асосида қайта ташкил этилмоқда. Биз талабаларнинг оммавий спорт билан ­қамровини ошириш бўйича ўзимиз учун аниқ мақсад ва кўрсаткичларни белгилаб олдик. Университетдаги мавжуд спорт тўгараклари фаолияти тўлиқ инвентаризациядан ўтказилиб, уларнинг натижадорлиги доимий мониторинг қилиб борилади. Ёшлар орасида оммавийлашаётган кросс-фит ва бошқа замонавий спорт турларини олийгоҳимизга киритиш орқали талабаларнинг фаоллигини ва спортга қизиқишини янада оширишни мақсад қилганмиз.

Мавжуд спорт инфратузилмасидан фойдаланиш самарадорлигини ошириш, иқтидорли талаба спортчиларни кашф этиб, уларни профессионал спорт сари йўналтириш кундалик ишимизга айланади. Ҳудудий спорт ташкилотлари ва федерациялар билан ҳамкорликни кенгайтириб, янги лойиҳаларни ҳаётга татбиқ этамиз. Зеро, талаба ёшларнинг соғлом ва жисмонан баркамол бўлиб етишиши уларнинг келажакда ўз соҳасининг етук, фидойи ва кучли мутахассислари бўлиб етишишида энг муҳим пойдевордир.

Ойбек ЭРГАШЕВ,

Наманган давлат техника университети ректори, профессор
Ҳамкорлик материали