Маълум қилинишича, Ўзбекистон Республикаси Давлат хавфсизлик хизматининг Жиззах вилояти бўйича бошқармаси ва прокуратура органлари ҳамкорлигида ўтказилган тезкор тадбирда Самарқанд вилоятининг Ургут туманида фаолият юритувчи адвокатнинг ноқонуний ҳаракатига чек қўйилган. У мансабдор танишлари орқали Жиззах вилоятидаги манзил-колонияда жазо ўтаётган маҳкумнинг жазо муддатини қисқартириб бериш эвазига унинг яқинидан 15 минг АҚШ доллари олган вақтида ашёвий далиллар билан ушланган.
Шунингдек, Самарқанд вилоятининг Қўшработ туманида фаолият юритувчи яна бир адвокат жиноят ишлари бўйича туман судида ҳимоячи сифатида иштирок этиб, мансабдор танишлари орқали судланувчига енгилроқ жазо тайинланишига ёрдам беришини айтган. Бунинг эвазига у судланувчининг ўғлидан 2 минг АҚШ доллари талаб қилган ва тезкор тадбир давомида сўралган маблағни олаётган вақтида ушланган.
Ҳозирда ҳар икки адвокатга нисбатан жиноят иши қўзғатилган бўлиб, тергов ҳаракатлари давом этмоқда.
