Давлат хавфсизлик хизматининг Сурхондарё вилояти бўйича бошқармаси ходимлари ДХХ Чегара қўшинлари ҳамда вилоят Ички ишлар бошқармаси билан ҳамкорликда Термиз туманида тезкор тадбир ўтказди.
Тадбир давомида жами 5 та ўрамдаги, умумий оғирлиги 5 килограмм 362 грамм бўлган «афюн» моддасини шартли харидорга сотаётган вақтда Термиз шаҳрида яшовчи, 1972 ва 1995 йилларда туғилган икки нафар фуқаро ушланди.
Маълум қилинишича, гиёҳвандлик воситалари уларга қўшни Афғонистондаги наркокурьерлар томонидан етказиб берилган.
Қайд этилишича, ушланганларнинг бири муқаддам ўғирлик, иккинчиси эса гиёҳвандлик воситалари билан боғлиқ жиноят содир этгани учун судланган.
Ҳолат юзасидан жиноят иши қўзғатилган. Ҳозирда тергов ҳаракатлари олиб борилмоқда.
