Бу ҳақда «Ҳудуд» информацион дастурида хабар берилди.
Маълум бўлишича, улар ўзларини муаммоларни ҳал қилувчи куч сифатида кўрсатиб, фуқароларга босим ўтказишган. Ушбу шахсларнинг жиноий ҳаракатларига қонуний баҳо берилди.
Сурхондарё вилоятининг Денов туманида яшовчи йигирма саккиз ёшли фуқаро ўзининг тўрт нафар жиноий шериклари билан бирлашиб, туман ҳудудида бир нечта безорилик жиноятини содир этиб, осонгина даромад топиш учун «Альфа» номли гуруҳ тузади.
Ушбу гуруҳ йигитлари кунларнинг бирида кўчада бир фуқарони ушлаб, автомашинасига мажбурлаб ўтирғизиб, ундан икки минг беш юз доллар миқдоридаги пулларни беришини талаб қилади. Улар фуқаронинг автомашинаси калити ва ҳужжатларини қўлга киритади. Ушбу ҳолатни видео тасвирга тушириб, товламачилик жиноятини қасддан содир қилган.
Кўча безорилари яна бир ҳолатда, дўсти билан боғлиқ автоҳалокат сабаб уни кўриш учун тез тиббий ёрдам бўлимига бориб, жамоат жойида фуқаролар ва беморлар тинчлигини бузади. Шифокор ҳамда манзилда бўлган беморни дўппослаб, ички ишлар ходимларининг қонуний ҳаракатларига фаол қаршилик кўрсатишади. Аммо шаҳар бу дарвоза эмас.
Улар содир этган жиноят ишлари кўриб чиқилиб, суд ҳукми ўқилди. Судланувчилардан бирига уч йил муддатга, бир нафарига беш йил, яна икки нафар судланувчига эса беш йилу бир ой муддатга озодликдан маҳрум қилиш жазоси тайинланди.
