Ёшларга оид давлат сиёсати доирасида амалга оширилаётган ислоҳотлар натижасида ўз меҳнати, интилиши ва истеъдоди билан юксак натижаларга эришаётган ёшлар сафлари тобора кенгайиб бормоқда.
Шундай ёшлардан бири — Исломова Маржона. У 2003 йилда Жиззах вилояти, Жиззах шаҳрида таваллуд топган. Болалигидан спортга меҳр қўйган Маржона сузиш ва сувга сакраш спорт турлари билан ўн йил давомида мунтазам шуғулланди. У сузиш бўйича биринчи разряд соҳибаси, сувга сакраш бўйича эса спорт устаси ҳисобланади. Фаолияти давомида бир неча бор Ўзбекистон чемпиони бўлиб, мамлакатимиз спортида муносиб натижаларга эришди.
2016 йилда Жиззах Олимпия захиралари коллежида сузиш йўналишида таҳсил олди. 2021 йилда Ўзбекистон давлат жисмоний тарбия ва спорт университетининг бакалавриат босқичига давлат гранти асосида ўқишга қабул қилинди. Университетда ўқиш давомида ташаббускорлиги, намунали хулқи ва жамоат ишларидаги фаоллиги билан ажралиб туриб, Ёшлар иттифоқи фаоллари сафидан ўрин олди. 2023 йилда Президент ташаббуси билан таъсис этилган Ислом Каримов номидаги давлат стипендияси соҳибаси бўлди. Шунингдек, магистратура босқичига 100 фоизлик давлат гранти асосида тавсия этилди. 2024 йилда Жисмоний тарбия ва спорт илмий-тадқиқотлар институти магистратурасига синхрон сузиш йўналиши бўйича 100 фоиз давлат гранти асосида ўқишга қабул қилинди.
Маржона Исломова бугунги кунда беш йилдан буён сузиш бўйича мураббий сифатида фаолият юритиб келмоқда. Шу вақт давомида кўплаб ёш спортчиларни тайёрлади, республика ва халқаро мусобақаларда мураббий сифатида иштирок этди. Биз Маржона Исломова билан унинг спортдаги ютуқлари, мураббийлик фаолияти ва ёшлар учун муҳим бўлган масалалар ҳақида суҳбатлашдик.
— Маржона, спортга бўлган қизиқишингиз қандай бошланган?
— Болалигимдан сувни яхши кўрардим. Ота-онам менинг қизиқишимни қўллаб-қувватлади ва спорт билан шуғулланишим учун барча шароитларни яратиб беришди. Шу ишонч менга куч берди. Кейинчалик машғулотлар менинг ҳаётимнинг ажралмас қисмига айланди ва катта спортга қадам қўйдим. Сузиш ва сувга сакраш спорт тури инсон саломатлиги учун энг фойдали йўналишлардан бири ҳисобланади. Сузиш нафақат мусобақалар учун, балки ҳар бир инсоннинг соғлом ҳаёт кечириши учун ҳам жуда муҳим. У бутун организмни чиниқтиради, барча мушакларни бир вақтнинг ўзида ишлатади ва инсонни жисмонан бақувват қилади.
— Спортда эришган энг муҳим ютуқларингиз ҳақида сўзлаб берсангиз.
— Ўн йил давомида сузиш ва сувга сакраш билан шуғулландим. Шу вақт ичида бир неча бор Ўзбекистон чемпиони бўлдим. Сузиш бўйича биринчи разряд, сувга сакраш бўйича спорт устаси унвонига эга бўлдим. Мен учун энг катта ютуқлардан яна бири — 2023 йилда Ислом Каримов номидаги давлат стипендияси соҳибаси бўлганим ва магистратурага 100 фоиз давлат гранти асосида тавсия этилганимдир. 2024 йилда эса Жисмоний тарбия ва спорт илмий-тадқиқотлар институти магистратурасига давлат гранти асосида қабул қилинганим мен учун катта шараф бўлди.
— Бугунги кунда мураббий сифатида ҳам фаолият олиб боряпсиз. Бу касб сиз учун нимани англатади?
— Мураббийлик мен учун жуда масъулиятли касб. Мен фақат спортчи тайёрлашни эмас, балки ёшларни соғлом, иродали ва интизомли инсон қилиб тарбиялашни ҳам ўз олдимга мақсад қилиб қўйганман. Шогирдларимнинг ҳар бир ютуғи мен учун ҳам катта бахт.
— Сузишнинг инсон саломатлиги учун қандай фойдалари бор?
— Сузиш энг фойдали спорт турларидан бири ҳисобланади. У юрак-қон томир тизимини мустаҳкамлайди, нафас олиш фаолиятини яхшилайди, иммунитетни кучайтиради. Шунингдек, умуртқа поғонасидаги муаммолар, сколиоз, ревматизм каби касалликларнинг олдини олишда ва тикланиш жараёнида ҳам жуда катта аҳамиятга эга.
Бундан ташқари, сузиш инсоннинг руҳий ҳолатига ҳам ижобий таъсир кўрсатади.
Машғулотлар стрессни камайтиради, асаб тизимини тинчлантиради ва инсонни кун давомида тетик сақлайди.
— Кўпчилик сувдан қўрқади. Бу қўрқувни қандай енгиш мумкин?
— Сувдан қўрқиш табиий ҳолат. Уни енгиш учун инсонга вақт ва тўғри ёндашув керак. Машғулотлар албатта тажрибали мураббий назоратида, босқичма-босқич олиб борилиши лозим. Аввало сувга ишонч ҳосил қилиш, тўғри нафас олиш машқларини бажариш ва оддий ҳаракатлардан бошлаш муҳим. Ҳар бир кичик натижа инсоннинг ўзига бўлган ишончини оширади.
Мураббий сифатида мен спортчиларнинг психологик ҳолатига ҳам катта эътибор бераман. Чунки қўрқувни енгиш, аввало, инсоннинг онги ва ишончидан бошланади. Болалар ва катталар билан ишлаш жараёнида уларни руҳан қўллаб-қувватлаш, мотивация бериш ва ҳар бир ҳаракатини тўғри баҳолаш орқали сувдан қўрқишни бартараф этиш мумкин.
— Спорт инсон характерига қандай таъсир қилади?
— Спорт инсонни интизомли, сабрли, масъулиятли ва иродали қилади. Машғулотларда шаклланган фазилатлар кейинчалик ҳаётда ҳам катта ёрдам беради. Шунинг учун ҳар бир ёшга спорт билан мунтазам шуғулланишни тавсия қиламан.
— Ёшларга қандай маслаҳат берган бўлардингиз?
— Ҳеч қачон ўзингизга бўлган ишончни йўқотманг. Олдингизга катта мақсад қўйинг ва унга етишиш учун доим меҳнат қилинг. Имкониятлардан унумли фойдаланинг, билим олинг, спорт билан шуғулланинг. Энг муҳими, қийинчиликлардан қўрқманг. Ҳар бир катта ғалаба ортида катта меҳнат ва сабр туради.
— Келажакдаги режаларингиз қандай?
— Келгусида халқаро даражадаги малакали мураббий бўлишни, янада кўпроқ чемпион спортчиларни тарбиялашни ва Ўзбекистон спортининг ривожига муносиб ҳисса қўшишни мақсад қилганман. Энг катта орзум — шогирдларимнинг халқаро майдонларда давлатимиз байроғини юксакларга кўтаришидир.
Маржона Исломованинг ҳаёт йўли меҳнат, билим, интилиш ва қатъият ҳар қандай орзуга элтувчи энг ишончли йўл эканини яна бир бор исботлайди. У нафақат бир неча карра Ўзбекистон чемпиони, балки иқтидорли мураббий сифатида ҳам юзлаб ёшларни спортга жалб этиб, уларнинг соғлом, баркамол ва иродали инсон бўлиб камол топишига муносиб ҳисса қўшиб келмоқда.
Унинг фикрича, спорт — фақат медаллар ёки ғалабалар эмас, балки инсон саломатлиги, кучли ирода, соғлом фикрлаш ва ҳаётга бўлган ишончни шакллантирувчи энг муҳим омиллардан биридир. Ана шундай фидойи, билимли ва ташаббускор ёшлар Янги Ўзбекистон тараққиётининг мустаҳкам таянчи ва мамлакатимиз келажагининг ишончли эгаларидир.
Зулхумор Акбарова
