Бош прокуратура ҳузуридаги Департаментнинг Риштон тумани бўлими томонидан ўтказилган терговга қадар текширувда “Риштон туман газ” таъминоти бўлими ходимлари С.Ш. ва М.О. фуқаро Ҳ.У.нинг “Бирлашган” МФЙ ҳудудидаги хонадонини табиий газ тармоғига улаб, ҳужжатларини расмийлаштириб беришлари эвазига 5,2 млн сўмни фирибгарлик йўли билан қўлга киритиб, ўз эҳтиёжлари учун ишлатиб юборганликлари аниқланган.
Бош прокуратура ҳузуридаги Департаментнинг Уйчи тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган тезкор тадбирда “Уйчитумангаз” газ таъминоти бўлими етакчи муҳандиси Б.Д. фуқаро Н.Э.нинг "Гулбоғ" МФЙ манзилидаги хонадонини газ тармоғига улаб, ҳисоблагич ўрнатиб бериши эвазига ўз хизмат хонасида 4,5 млн сўмни олган вақтида ашёвий далиллар билан ушланган.
Департаментнинг Чортоқ тумани бўлими ва бошқа ҳуқуқни муҳофаза қилувчи орган ходимлари ҳамкорлигида ўтказилган яна бир тезкор тадбирда “Янгиқўрғон тумангаз” газ таъминоти етакчи муҳандиси А.А. фуқаро Н.И.нинг хонадонини газ тармоғига улаш ва янги абонент ҳисоб-рақами очиб бериши эвазига филиал қоровули орқали 4,8 млн сўмни олган вақтида ашёвий далиллар билан ушланган.
Департаментнинг Избоскан тумани бўлими ва бошқа ҳуқуқни муҳофаза қилувчи орган ходимлари ҳамкорлигида тадбиркорлик субъектларининг ҳуқуқларини ҳимоя қилиш юзасидан ўтказилган тезкор тадбирда “Ҳудудгаз Андижон” ГТФ Избоскан филиали собиқ бўлим бошлиқлари А.И. ва К.Ю. тадбиркорнинг ишончига кириб, унинг хизмат кўрсатиш шохобчасида табиий газ таъминотидан ҳисобланган 76 млн сўм қарздорлигини “Ҳудудгаз Андижон” ГТФ бўлим мутахассиси Н.К. орқали йўқ қилиб беришлари эвазига қўлга киритган 500 АҚШ доллари ҳисобидан 2,3 млн сўмини А.И. тадбиркорга қайтариб берган вақтида ашёвий далиллар билан ушланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
