Бу жараёнда Президентимизнинг тадбиркорлар билан ҳар йили ўтказиладиган очиқ мулоқот шаклидаги учрашувлари нафақат муаммоларни аниқлаш, балки уларни амалий ҳал этиш механизмларини белгилаб беришда муҳим аҳамият касб этмоқда.

Мазкур мулоқотлар якуни бўйича қабул қилинадиган фармон ва қарорларда белгиланган вазифалар ижросини ўз вақтида ва тўлиқ таъминлаш эса кутилган натижаларга эришишнинг асосий омилидир.

Хусусан, тадбиркорлар кўтарган муаммолар асосида ишлаб чиқилган чора-тадбирлар “йўл хариталари” орқали аниқ вазифалар, муддатлар ва масъул ижрочилар кесимида белгилаб берилаётгани ижро интизомини кучайтиришга хизмат қилмоқда.

Ижрони таъминлаш жараёнида мутасадди вазирлик ва идоралар томонидан тизимли назорат ўрнатилиши, топшириқларнинг босқичма-босқич бажарилиши ҳамда қилинган ишлар юзасидан доимий мониторинг юритилиши натижадорликни оширишда муҳим аҳамиятга эга. Шу орқали қабул қилинган қарорларнинг қоғозда қолиб кетмай, амалда тадбиркорлик субъектлари фаолиятида ифодасини топиши таъминланмоқда.

Айниқса, маъмурий тўсиқларни бартараф этиш, молиявий қўллаб-қувватлаш механизмларини кенгайтириш, солиқ ва божхона тартиб-таомилларини соддалаштириш каби йўналишларда белгиланган вазифалар ижроси тадбиркорлик муҳитида сезиларли ижобий ўзгаришларга олиб келмоқда. Бу эса, ўз навбатида, бизнес субъектларининг фаоллигини ошириш, янги иш ўринлари очиш ва инвестицияларни жалб этиш катта аҳамиятга эга.

Шу билан бирга, ижро интизомини мустаҳкамлаш, масъул ташкилотлар фаолиятини мувофиқлаштириш ҳамда натижадорликка эришишда жамоатчилик назорати ва тадбиркорлар фикр-мулоҳазаларини инобатга олиш муҳим ўрин тутади. Бу эса давлат органлари ҳамда бизнес ўртасида очиқлик ва ўзаро ишонч муҳитини янада мустаҳкамлайди.

Очиқ мулоқот доирасида белгиланган вазифалар ижросини самарали ташкил этиш ва қатъий назорат қилиш орқали қабул қилинаётган қарорларнинг натижадорлиги таъминланмоқда. Шунингдек, тадбиркорликни ривожлантириш, қулай бизнес муҳитини шакллантириш ва иқтисодиёт барқарор ўсишини таъминлашга хизмат қиладиган мустаҳкам институционал тизим шаклланмоқда.

Ҳужжатлар қоғозда эмас, амалда натижа бериши керак

Давлат бошқарувида самарадорликни ошириш, бошқарувнинг институционал механизмларини такомиллаштириш, энг муҳими, ижро интизомини мустаҳкамлаш масаласи мамлакатимиздаги ислоҳотларнинг асосий пойдеворидир.

Қабул қилинаётган ҳужжатлар ижросини таъминлашда, шубҳасиз, давлат идоралари ҳамда ташкилотларда ижро интизоми қатъий йўлга қўйилган бўлиши керак. Зеро, ҳар қанча ҳужжат ёки қарор зарур бўлса, уни ишлаб чиқиш, қабул қилиш мумкин, бироқ ана шу ҳужжатларнинг ҳаётдаги ижроси таъминланмаса, ислоҳотлар натижадорлиги кўринмайди. Ҳаётидаги, ён-атрофидаги ўзгаришларни ҳар бир инсон ҳис этиши учун ҳам бу жуда муҳим.

Шу боис, давлатимиз раҳбарининг ҳар бир ислоҳотида давлат идоралари ҳамда ташкилотларида ходимларнинг шахсий жавобгарлигини кучайтириш, ижро интизомини таъминлашга жиддий эътибор қаратилмоқда.

Мамлакатимиз етакчиси кенгайтирилган тартибда ўтказилган бир неча селектор йиғилишларида қонунчилик ҳужжатлари ижросини самарали йўлга қўйиш бўйича комплекс вазифаларни аниқ белгилаб берди.

Президентимизнинг 2021 йил 10 февралдаги “Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида”ги фармони ҳамда 2021 йил 31 майдаги
“Ijro.gov.uz” ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида”ги қарори бу борада муҳим дастуруламал ҳужжат бўлди.

Бугун давлатимиз раҳбарининг топшириқлари тўлиқ ва ўз вақтида ижро этилишида ушбу ҳужжатлар асосида ташкил этилган ягона ва узлуксиз технологик занжир тизими муҳим аҳамиятга эга.

Президентимиз таъкидлаганидек, қабул қилинаётган қонун ҳужжатлари ва топшириқлар қоғозда эмас, амалда натижа бериши керак. Бу тамойил ижро интизомига юксак амалий аҳамият бағишлади.

Қонунлар, Ўзбекистон Республикаси Президенти ва ҳукумат ҳужжатларининг ижроси устидан самарали назорат механизмларини жорий қилиш, ижро натижаси бўйича аниқ ҳисобдорликни таъминлаш, шунингдек, барча бўғиндаги раҳбарлар ва ходимларнинг ижро интизомига қатъий риоя этиш бўйича шахсий масъулияти ва жавобгарлигини янада ошириш мақсадида Президентининг 2025 йил 25 июлдаги “Давлат органлари ва ташкилотларда ижро интизомини янада мустаҳкамлашнинг қўшимча чора-тадбирлари тўғрисида”ги фармони ижро интизомини янада кучайтиришга қаратилган муҳим норматив-ҳуқуқий ҳужжатлардан бири сифатида натижадорликни янги сифат босқичига олиб чиқишга хизмат қилмоқда.

Мазкур фармон билан барча даражадаги мансабдорларнинг масъулияти янада оширилди, қонунчилик ҳужжатлари ва топшириқлар ижросини назорат қилишнинг самарали механизмлари йўлга қўйилди.

“Ijro.gov.uz” тизимида 2026 йилнинг биринчи чорагида Савдо-саноат палатаси жами 221 та топшириққа масъул этиб белгиланган. Шулар доирасида Ўзбекистон Респуб­ликаси Президентининг 158 та, Президент Администрацияси раҳбарининг 56 та ҳамда Вазирлар Маҳкамасининг қарорларида белгиланган 7 та топшириқ ижроси тўлиқ таъминланди.

Шу билан бирга, жорий йил май ойида Савдо-саноат палатаси томонидан 35 та топшириқни бажариш бўйича аниқ чора-тадбирлар белгилаб олинган.

Мурожаатлар билан ишлаш — ривожланиш омили

Давлатимиз раҳбари томонидан 2026 йил 13 март куни ўтказилган йиғилишда белгиланган вазифалар мамлакатимизда бошқарув тизимини янги босқичга олиб чиқиш, айниқса, ижро интизомини мустаҳкамлаш ва аҳоли мурожаатларига сифатли ёндашиш масаласида муҳим бурилиш нуқтаси бўлди.

Ушбу йиғилишда таъкидланган талаблар Савдо-саноат палатаси ва ҳудудий бўлинмалари олдига ҳам кечиктириб бўлмайдиган вазифаларни қўймоқда. Зеро, палата давлат ва тадбиркор ўртасидаги кўприк бўлиб, бу ердаги ҳар бир мурожаат ортида бизнес вакилининг тақдири ва инвестиция муҳити мужассам.

Йиғилишда Президентимиз ижро интизоми фақат қоғоз тўлдириш эмас, балки қарорларнинг ҳаётдаги ижросини таъминлаш эканини қатъий белгилаб берди. Палата тизимида ҳам ҳар бир топшириқ ҳамда мурожаат ижроси юзасидан “қатъий назорат ва шахсий масъулият” тамойили жорий этилмоқда.

Муддатларнинг кечикишига эмас, балки муаммонинг мазмунан ҳал этилишига асосий эътибор қаратилмоқда.

Мурожаатлар билан ишлаш шунчаки жавоб хати ёзиш эмас. Давлатимиз раҳбарининг кўрсатмасига кўра, энди палатага келиб тушаётган ҳар бир мурожаат бўйича тадбиркорнинг муаммоси жойига чиққан ҳолда ўрганилади.

Президентимиз қўйган талаблар фаолиятимиздаги энг муҳим мезонлар этиб белгиланди. Ижро интизомига қатъий риоя қилиш ва мурожаатларни ўз вақтида, сифатли ҳал этиш орқали иқтисодий ўсишни таъминлаш баробарида халқимизнинг, хусусан, тадбиркорларимизнинг давлатга ишончини мус­таҳкамлаймиз.

Биринчи чорак таҳлили ва устувор мақсадлар

Жорий йил 24 апрель куни давлатимиз раҳбари ҳузурида ҳудудлар ва тармоқларда иқтисодий ўсишни таъминлашнинг биринчи чорак якунлари ҳамда йил охиригача белгиланган устувор вазифаларга бағишланган муҳим йиғилиш бўлиб ўтди. Унда белгиланган топшириқлар мамлакат иқтисодиётининг барқарорлигини таъминлашда давлат органлари билан бирга Савдо-саноат палатаси каби бизнес ҳамжамияти вакиллари олдига ҳам аниқ талабларни қўйди.

Йиғилишда таъкидланганидек, жорий йилнинг дастлабки уч ойи иқтисодиётимиз учун синов ва имкониятлар даври бўлди. Тармоқлар кесимида ўсиш суръати таҳлил қилинар экан, асосий эътибор ички захираларни сафарбар этиш ва инвестициявий лойиҳаларни жадаллаштиришга қаратилди.

Палата тизими учун бу давр тадбиркорларнинг муаммоларини тизимли ўрганиш ва уларнинг экспорт салоҳиятини ошириш бў­йича амалий чоралар кўриш палласи бўлди. Бироқ мамлакатимиз етакчиси таъкидлаганидек, эришилган натижалар билан чекланиб қолмай, ҳали ишга солинмаган улкан салоҳиятдан фойдаланиш зарур.

Йиғилиш якунларидан келиб чиқиб, Савдо-саноат палатасида йил якунига қадар қатор йўналишларда вазифалар белгилаб олинди.

Жумладан, ҳар бир туман ва шаҳарнинг ўзига хос ихтисос­лашувидан келиб чиқиб, янги ишлаб чиқариш қувватларини ишга тушириш кўзда тутилди. Бунда палата тадбиркорларга лойиҳавий ҳужжатларни тайёрлаш ва бозор топишда яқиндан кўмак беради.

Йирик саноат корхоналари атрофида кичик ва ўрта бизнес вакилларининг кооперация алоқалари кенгайтирилади. Бу маҳаллийлаштириш даражасини оширишнинг энг самарали йўлидир.

Фақат анъанавий бозорлар билан чекланиб қолмай, янги ва истиқболли йўналишларга чиқиш учун тадбиркорларни сертификатлаш ва халқаро стандартларга мослаштириш ишлари кучайтирилади.

Йиғилишда Президентимиз иқтисодий ўсишга тўсиқ бўлаётган омилларни бартараф этиш бўйича қатъий кўрсатмалар берди. Савдо-саноат палатаси фаолиятида бу топшириқлар тадбиркорликка халал бераётган бюрократик тўсиқларни доимий мониторинг қилиш, бизнес муҳитини яхшилаш бўйича қонунчиликка таклифлар киритиш, ҳар бир инвестиция лойиҳасининг тақдири учун масъулиятни ҳис қилиш демакдир.

Йил якунига қадар иқтисодий кўрсаткичларнинг барқарор ўсишини таъминлаш янги иш ўринлари очиш, аҳолининг даромадини ошириш ва тадбиркорларимизнинг фаровонлигига хизмат қилади.

Тадбиркорлар ҳаётидаги ўзгаришлар

Солиқ сиёсатидаги ислоҳотлар туфайли тадбиркорлар учун солиқ юки қисқартирилди ва ҳисоб-китоб жараёни соддалаштирилди. Масалан, айрим турдаги солиқ ставкалари пасайтирилиши ва ҳисобот топшириш тизимининг рақамлаштирилиши кичик бизнес вакиллари учун катта енгиллик берди. Илгари тадбиркор солиқ ҳисоботини тайёрлаш учун алоҳида мутахассис жалб қилишга мажбур бўлган. Ҳозир электрон тизимлар орқали бу жараён анча осонлашди.

Яна бир муҳим ўзгариш лицензия ва рухсат бериш тартиб-таомилларининг соддалаштирилиши бўлди. Илгари тадбиркор фаолият бошлаш учун бир нечта идорага мурожаат қилиши, кўп вақт ва ресурс ­сарфлаши талаб этилар эди. Янги тартиблар жорий этилиши туфайли эса кўплаб рухсатномалар бекор қилинди ёки “бир дарча” тамойили асосида тақдим этиладиган бўлди. Масалан, кичик ишлаб чиқариш ёки хизмат кўрсатиш фаолиятини бошлаш учун зарур рухсатномаларни қисқа муддатда олиш имкони пайдо бўлди.

Молиявий қўллаб-қувватлаш механизмларининг кенгайиши ҳам тадбиркорлар учун катта имкониятлар яратмоқда. Жумладан, имтиёзли кредитлар, субсидиялар ва давлат кафолатлари орқали тадбиркорлар ўз бизнесини кенгайтириш ёки янги лойиҳаларни амалга ошириш имконига эга бўлмоқда. Масалан, ишлаб чиқаришни йўлга қўйишни режалаштираётган тадбиркор паст фоизли кредит олиш орқали ускуналар харид қилиб, фаолиятини бошлаши мумкин.

Божхона ва ташқи савдо соҳасидаги енгилликлар ҳам экспорт қилувчи тадбиркорлар ҳаётида ижобий ўзгаришлар яратди. Экспорт жараёнининг соддалаштирилиши, ортиқча текширувларнинг қисқартирилиши ва логистикага доир қулайликлар натижасида тадбиркорлар ташқи бозорларга чиқишда камроқ тўсиққа дуч келмоқда. Масалан, маҳаллий ишлаб чиқарувчи ўз маҳсулотини хорижга экспорт қилишда ҳужжатлаштириш жараёнини тез ва шаффоф бажара олади.

Шу билан бирга, текширув тизимининг тартибга солиниши ҳам тадбиркорлар фаолиятига ижобий таъсир кўрсатмоқда. Назорат органлари томонидан текширувлар сони қисқартирилиб, уларни ўтказиш тартиби аниқ белгилаб қўйилди. Бу эса тадбиркорларнинг ортиқча безовта қилинишига чек қўйиб, уларнинг асосий эътиборини бизнесни ривожлантиришга қаратиш имконини бермоқда.

Тадбиркорлар учун қабул қилинаётган қонун ҳужжатлари уларнинг кундалик фао­лиятини енгиллаштириш, харажатларини камайтириш ва янги имкониятлар очишга хизмат қилмоқда. Бу эса, ўз навбатида, тадбиркорлик фаоллигининг ошиши, янги иш ўринлари очилиши ва иқтисодиётнинг барқарор ўсишига мустаҳкам замин ҳозирламоқда.

Бизнеснинг жамият олдидаги масъулияти

Давлатимиз томонидан ҳамда Савдо-саноат палатаси кўмагида бизнес учун кўплаб тўсиқлар олиб ташланди, солиқлар оптималлаштирилди.

Хўш, бунга жавобан тадбиркорлар ижтимоий ва иқтисодий соҳага реал ҳаётда қандай ҳисса қўшмоқда? Қуйида бунинг аниқ ва ҳаётий далилларини кўриб чиқамиз.

Биргина Uzum Market миллий маркетплейсини олайлик. Давлат томонидан АT ва электрон тижорат соҳасига берилган эркинликлар натижасида ушбу компания қисқа муддатда улкан логистика марказларини қурди. Улар бутун бошли янги савдо экотизимини яратди. Чекка вилоятдаги оддий ҳунарманд ёки кичик цех эгаси ўз маҳсулотини бутун Ўзбекистон бўйлаб сотиш имконига эга бўлди.

Курьерлар, омборхона ишчилари, сараловчилар ва АT мутахассислари сифатида ўн минглаб ёшлар расмий иш билан таъминланди. Илгари бу ёшларнинг кўпи чет элга иш қидириб кетишга мажбур эди.

Бизнесга берилган енгилликлар тадбиркорларни соядан чиқишга ундади. Бунинг энг ёрқин намунаси “Korzinka” супермаркетлар тармоғидир. Бу компания хуфиёна савдо (яширин иқтисодиёт)дан воз кечиб, 100 фоиз очиқ тизимда ишлайди. Натижада ҳар йили давлат бюджетига юзлаб миллиард сўм солиқ тўлайди. Ўз ўрнида бу маблағ ижтимоий-иқтисодий соҳаларнинг ривожланиши учун йўналтирилади.

Компания ногиронлиги бор шахсларни ишга қабул қилиш бўйича дастурларни мунтазам амалга оширади. Шунингдек, Рамазон ойи ва бошқа байрамларда кам таъминланган оилаларга йирик миқдорда озиқ-овқат ёрдамларини манзилли етказиб беради.

Бугунги тадбиркорлар фақат ўз объектини эмас, атроф-муҳитни ҳам обод қилмоқда. Давлатимиз раҳбари ташаббуси билан бош­ланган “Яшил макон” умуммиллий лойиҳаси доирасида Murad Buildings, Golden House каби йирик қурилиш компаниялари ва юзлаб маҳаллий тадбиркорлар ўз ҳисобидан минглаб туп қимматбаҳо манзарали дарахт кўчатларини сотиб олиб, шаҳар ва туманларда янги экобоғлар барпо этди. Шунингдек, кўплаб тадбиркорлар ўз корхонаси атрофидаги йўлларни асфальт қилиб, бекатлар қуриб, маҳалла инфратузилмасини ўзгартирмоқда.

Давлатимиз раҳбари қўллаб-қувватлови билан яратилган шароитлар туфайли тадбиркорлар бугун йирик иш берувчи, давлат бюджетининг асосий донори ва ижтимоий муаммоларни ҳал қилувчи шерикка айланди. Улар ўзининг реал саъй-ҳаракатлари ва барпо этаётган тизими орқали жамият фаровонлигига катта ҳисса қўшиб келмоқда.

Янги Ўзбекистон тараққиётининг ҳаракатлантирувчи кучи

Ҳаётимизнинг барча жабҳаси каби иқтисодий соҳада, айниқса, тадбиркорликни ривожлантириш борасида ҳам муҳим натижалар қўлга киритилмоқда.

Жаҳоннинг илғор тажрибасига таянган ҳолда замонавий ва самарали бошқарув воситаларини жорий этиш орқали тадбиркорликни қўллаб-қувватлаш, ишбилармонлик муҳитини эркинлаштириш ва бизнес манфаатларини энг устувор қадрият сифатида таъминлашга алоҳида эътибор қаратилмоқда.

Айнан ҳозир мамлакатимизда бу масалага катта эътибор берилаётгани асло бежиз эмас. Чунки жаҳон халқлари ва замонавий илғор мамлакатлар иқтисодиётининг натижадорлигини, ҳаракатчанлиги ва ўсувчанлигини таъминлаш, соҳани ривожлантиришда тадбиркорликнинг ўзига хос ўрни борлиги аллақачон исботланган.

У тараққий этган мамлакатлар ҳаётининг асосий элементларидан ва юртимиз иқтисодиёти учун ҳам энг муҳим омиллардан бири сифатида самарадорлигини кўрсатмоқда. Бу борада мамлакатимизда тадбиркорлик соҳасига оид баъзи рақамлар ва далилларни келтиришнинг ўзиёқ ушбу фикрни яққол исботлайди.

Бугун тадбиркорлик ҳаракати Ўзбекис­тон жамиятининг ўзига хос, иқтисодий жиҳатдан мустаҳкам янги ижтимоий қатламига ва янги Ўзбекистон тараққиётининг ҳаракатлантирувчи кучига айланди.

Тадбиркорлик ҳаракати мамлакатимизнинг энг сара қатламлари вакилларини қамраб олаётир. Чунки авваллари иқтисодиётнинг саноқли йўналишларида, асосан ишлаб чиқариш ва савдо соҳалари тадбиркорлик сифатида тушунилган бўлса, ҳозир тадбиркорликнинг географияси анча кенгайган.

Хуллас, тадбиркорлик жамиятнинг барча жабҳасида ўз ўрнига эга бўлиб бормоқда. Ахборот технологиялари, тиббиёт, таълим, санъат, кинематография ва ҳатто ижтимоий тармоқлар ҳам бизнеснинг бир кўриниши. Бу иқтисодиёт учун ҳам, жамият учун ҳам ижобий жиҳатларини кўрсатмоқда.

Энди тадбиркорлик шунчаки даромад олиш билан чекланиб қоладиган фаолият тури бўлиб қолмай, ижтимоий-иқтисодий соҳадаги бошқа йўналишларни ҳам ривож­лантиришга туртки бўладиган муҳим соҳага айланмоқда.

Давлатимиз раҳбарининг тадбиркорликка қаратаётган эътибори туфайли ҳар бир идора ва ташкилот бизнес соҳасини ривож­лантиришга масъуллиги белгиланди.

Яна бир муҳим жиҳат шуки, Президентимиз таъбири билан айтсак, тадбиркорлик, ишбилармонлик, аввало, ёшларга хос фазилатдир.

Демак, тадбиркорликка йўл очиш, ­аввало, ёшларга кенг йўл очиб бериш ва бу борадаги ислоҳотлар ҳам ёшларнинг фаровон келажаги учун, ҳам бизнес истиқболи, жаҳон бозорига маҳаллий маҳсулотларни олиб чиқишнинг пухта ўйланган самараси, десак муболаға бўлмайди.

Буларнинг барчаси Президентимизнинг ушбу соҳага алоҳида эътибор қаратгани, айни жабҳада ислоҳотларнинг аниқ стратегияси амалга оширилаётгани билан изоҳланади. Жумладан, бундан икки йил олдин ниҳоятда яхши тажриба — Тадбиркорлар куни арафасида Президентимизнинг энг илғор тадбиркорлар билан очиқ мулоқот шаклидаги учрашувлари, яъни тўпланиб қолган масалаларга биргаликда ечим топиш амалиёти йўлга қўйилгани ва ушбу анъана давом эттирилаётгани бунинг яққол далилидир.

Президентимиз таъкидлаганидек, сўнг­ги 7-8 йилда халқаро майдонда бўлаётган ўзгаришлар дунё иқтисодиётига, жумладан, миллий иқтисодиётимизга ҳам катта таъсир ўтказмоқда.

Турли зиддиятлар туфайли логистика ва маҳсулот етказиб бериш занжири узилгани, ҳамкор мамлакатлар валютаси қадрсизлангани, глобал миқёсда инфляция даражаси юқори бўлиб қолаётгани оқибатида молиявий ресурслар қимматлашгани каби омиллар таъсирини соҳа вакиллари сезиб турибди.

Бундай мураккаб шароитда муаммоларни бевосита бизнес вакилларининг ўзидан эшитиб, уларга биргаликда ечим топиш ва шу орқали тезкор қарор қабул қилиш энг тўғри йўл эканини ҳаётнинг ўзи исботлаб берди.

Ягона “технологик занжир” тамойили

Тадбиркорлар куни арафасида ўтказилган учрашув якунлари бўйича давлатимиз раҳбарининг 2025 йил 19 августдаги “Ўзбекистон Республикаси Президентининг тадбиркорлар билан V очиқ мулоқотида белгиланган вазифаларни амалга ошириш чора-тадбирлари тўғрисида”ги фармони алоҳида аҳамият касб этади.

Мазкур ҳужжатда белгиланган вазифаларнинг изчил ва ўз вақтида ижросини таъминлаш орқали тадбиркорлик фаолиятидаги тизимли муаммоларни бартараф этиш, бизнес юритиш шароитларини янада енгиллаштириш ҳамда янги имкониятлар яратишга қаратилган аниқ чора-тадбирлар белгилаб берилган.

Фармон ижросини таъминлаш доирасида масъул вазирлик ва идоралар кесимида аниқ вазифалар, муддатлар ва ижро механизмларининг белгиланиши, шунингдек, доимий мониторинг ва назорат тизимининг йўлга қўйилиши қабул қилинган қарорларнинг амалдаги самарадорлигини оширишга хизмат қилмоқда. Айниқса, тадбиркорлар кўтарган муаммоларнинг манзилли ҳал этилиши, маъмурий тўсиқларни қисқартириш ва давлат хизматларини соддалаштириш каби йўналишларда қилинаётган ишлар ижобий натижалар бермоқда.

Шу жиҳатдан мазкур фармон нафақат стратегик вазифаларни белгилаб берувчи ҳужжат, балки уларнинг амалий ижросини таъминлаш орқали тадбиркорлар ҳаётида реал ўзгаришларни таъминлаётган муҳим механизм сифатида намоён бўлмоқда.

Ҳужжат билан 7 та устувор йўналиш бўйича комплекс чора-тадбирлар белгилаб берилди. Хусусан, тадбиркорликни молия­вий қўллаб-қувватлаш, солиқ тизимини такомиллаштириш, туризм ва хизматлар соҳасини ривожлантириш, бизнес учун маъмурий тўсиқларни қисқартириш каби муҳим йўналишлар қамраб олинган.

Мазкур фармон тадбиркорликни қўллаб-қувватлаш йўлида мустаҳкам ҳуқуқий пойдевор яратиб берди. Унга мувофиқ, соҳада 23 та қонун, 6 та фармон, 19 та қарор ҳамда ҳукуматнинг 29 та қарорини ишлаб чиқиш белгиланди. Бу кенг қамровли ислоҳотлар меъёрий базани такомиллаштириш билан бирга тадбиркорлик муҳитини мутлақо янги босқичга олиб чиқишга хизмат қилмоқда.

Натижада юртимизда ишбилармонлик муҳити янада жозибадор тус олиб, янги лойи­ҳаларга кенг йўл очилмоқда, инвестициявий фаоллик ортиб бормоқда. Энг асосийси, тадбиркор иқтисодиёт таянчи сифатида эътироф этилиб, унинг манфаатлари амалда ишончли ҳимоя қилинмоқда.

Замонавий бошқарув амалиётида ижро интизоми фақат топшириқларни бажариш эмас, балки уларнинг натижадорлигига эришишни ҳам назарда тутади. Шу маънода, ижро жараёнини ташкил этишда ягона “технологик занжир” тамойили муҳим аҳамият касб этади.

Даврон ВАҲОБОВ,

Савдо-саноат палатаси раиси