Bu jarayonda Prezidentimizning tadbirkorlar bilan har yili oʻtkaziladigan ochiq muloqot shaklidagi uchrashuvlari nafaqat muammolarni aniqlash, balki ularni amaliy hal etish mexanizmlarini belgilab berishda muhim ahamiyat kasb etmoqda.

Mazkur muloqotlar yakuni boʻyicha qabul qilinadigan farmon va qarorlarda belgilangan vazifalar ijrosini oʻz vaqtida va toʻliq taʼminlash esa kutilgan natijalarga erishishning asosiy omilidir.

Xususan, tadbirkorlar koʻtargan muammolar asosida ishlab chiqilgan chora-tadbirlar “yoʻl xaritalari” orqali aniq vazifalar, muddatlar va masʼul ijrochilar kesimida belgilab berilayotgani ijro intizomini kuchaytirishga xizmat qilmoqda.

Ijroni taʼminlash jarayonida mutasaddi vazirlik va idoralar tomonidan tizimli nazorat oʻrnatilishi, topshiriqlarning bosqichma-bosqich bajarilishi hamda qilingan ishlar yuzasidan doimiy monitoring yuritilishi natijadorlikni oshirishda muhim ahamiyatga ega. Shu orqali qabul qilingan qarorlarning qogʻozda qolib ketmay, amalda tadbirkorlik subyektlari faoliyatida ifodasini topishi taʼminlanmoqda.

Ayniqsa, maʼmuriy toʻsiqlarni bartaraf etish, moliyaviy qoʻllab-quvvatlash mexanizmlarini kengaytirish, soliq va bojxona tartib-taomillarini soddalashtirish kabi yoʻnalishlarda belgilangan vazifalar ijrosi tadbirkorlik muhitida sezilarli ijobiy oʻzgarishlarga olib kelmoqda. Bu esa, oʻz navbatida, biznes subyektlarining faolligini oshirish, yangi ish oʻrinlari ochish va investitsiyalarni jalb etish katta ahamiyatga ega.

Shu bilan birga, ijro intizomini mustahkamlash, masʼul tashkilotlar faoliyatini muvofiqlashtirish hamda natijadorlikka erishishda jamoatchilik nazorati va tadbirkorlar fikr-mulohazalarini inobatga olish muhim oʻrin tutadi. Bu esa davlat organlari hamda biznes oʻrtasida ochiqlik va oʻzaro ishonch muhitini yanada mustahkamlaydi.

Ochiq muloqot doirasida belgilangan vazifalar ijrosini samarali tashkil etish va qatʼiy nazorat qilish orqali qabul qilinayotgan qarorlarning natijadorligi taʼminlanmoqda. Shuningdek, tadbirkorlikni rivojlantirish, qulay biznes muhitini shakllantirish va iqtisodiyot barqaror oʻsishini taʼminlashga xizmat qiladigan mustahkam institutsional tizim shakllanmoqda.

Hujjatlar qogʻozda emas, amalda natija berishi kerak

Davlat boshqaruvida samaradorlikni oshirish, boshqaruvning institutsional mexanizmlarini takomillashtirish, eng muhimi, ijro intizomini mustahkamlash masalasi mamlakatimizdagi islohotlarning asosiy poydevoridir.

Qabul qilinayotgan hujjatlar ijrosini taʼminlashda, shubhasiz, davlat idoralari hamda tashkilotlarda ijro intizomi qatʼiy yoʻlga qoʻyilgan boʻlishi kerak. Zero, har qancha hujjat yoki qaror zarur boʻlsa, uni ishlab chiqish, qabul qilish mumkin, biroq ana shu hujjatlarning hayotdagi ijrosi taʼminlanmasa, islohotlar natijadorligi koʻrinmaydi. Hayotidagi, yon-atrofidagi oʻzgarishlarni har bir inson his etishi uchun ham bu juda muhim.

Shu bois, davlatimiz rahbarining har bir islohotida davlat idoralari hamda tashkilotlarida xodimlarning shaxsiy javobgarligini kuchaytirish, ijro intizomini taʼminlashga jiddiy eʼtibor qaratilmoqda.

Mamlakatimiz yetakchisi kengaytirilgan tartibda oʻtkazilgan bir necha selektor yigʻilishlarida qonunchilik hujjatlari ijrosini samarali yoʻlga qoʻyish boʻyicha kompleks vazifalarni aniq belgilab berdi.

Prezidentimizning 2021-yil 10-fevraldagi “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida”gi farmoni hamda 2021-yil 31-maydagi “Ijro.gov.uz” ijro intizomi idoralararo yagona elektron tizimi samarali faoliyat koʻrsatishini taʼminlashga qaratilgan qoʻshimcha chora-tadbirlar toʻgʻrisida”gi qarori bu borada muhim dasturulamal hujjat boʻldi.

Bugun davlatimiz rahbarining topshiriqlari toʻliq va oʻz vaqtida ijro etilishida ushbu hujjatlar asosida tashkil etilgan yagona va uzluksiz texnologik zanjir tizimi muhim ahamiyatga ega.

Prezidentimiz taʼkidlaganidek, qabul qilinayotgan qonun hujjatlari va topshiriqlar qogʻozda emas, amalda natija berishi kerak. Bu tamoyil ijro intizomiga yuksak amaliy ahamiyat bagʻishladi.

Qonunlar, Oʻzbekiston Respublikasi Prezidenti va hukumat hujjatlarining ijrosi ustidan samarali nazorat mexanizmlarini joriy qilish, ijro natijasi boʻyicha aniq hisobdorlikni taʼminlash, shuningdek, barcha boʻgʻindagi rahbarlar va xodimlarning ijro intizomiga qatʼiy rioya etish boʻyicha shaxsiy masʼuliyati va javobgarligini yanada oshirish maqsadida Prezidentining 2025-yil 25-iyuldagi “Davlat organlari va tashkilotlarda ijro intizomini yanada mustahkamlashning qoʻshimcha chora-tadbirlari toʻgʻrisida”gi farmoni ijro intizomini yanada kuchaytirishga qaratilgan muhim normativ-huquqiy hujjatlardan biri sifatida natijadorlikni yangi sifat bosqichiga olib chiqishga xizmat qilmoqda.

Mazkur farmon bilan barcha darajadagi mansabdorlarning masʼuliyati yanada oshirildi, qonunchilik hujjatlari va topshiriqlar ijrosini nazorat qilishning samarali mexanizmlari yoʻlga qoʻyildi.

“Ijro.gov.uz” tizimida 2026-yilning birinchi choragida Savdo-sanoat palatasi jami 221 ta topshiriqqa masʼul etib belgilangan. Shular doirasida Oʻzbekiston Respub­likasi Prezidentining 158 ta, Prezident Administratsiyasi rahbarining 56 ta hamda Vazirlar Mahkamasining qarorlarida belgilangan 7 ta topshiriq ijrosi toʻliq taʼminlandi.

Shu bilan birga, joriy yil may oyida Savdo-sanoat palatasi tomonidan 35 ta topshiriqni bajarish boʻyicha aniq chora-tadbirlar belgilab olingan.

Murojaatlar bilan ishlash — rivojlanish omili

Davlatimiz rahbari tomonidan 2026-yil 13-mart kuni oʻtkazilgan yigʻilishda belgilangan vazifalar mamlakatimizda boshqaruv tizimini yangi bosqichga olib chiqish, ayniqsa, ijro intizomini mustahkamlash va aholi murojaatlariga sifatli yondashish masalasida muhim burilish nuqtasi boʻldi.

Ushbu yigʻilishda taʼkidlangan talablar Savdo-sanoat palatasi va hududiy boʻlinmalari oldiga ham kechiktirib boʻlmaydigan vazifalarni qoʻymoqda. Zero, palata davlat va tadbirkor oʻrtasidagi koʻprik boʻlib, bu yerdagi har bir murojaat ortida biznes vakilining taqdiri va investitsiya muhiti mujassam.

Yigʻilishda Prezidentimiz ijro intizomi faqat qogʻoz toʻldirish emas, balki qarorlarning hayotdagi ijrosini taʼminlash ekanini qatʼiy belgilab berdi. Palata tizimida ham har bir topshiriq hamda murojaat ijrosi yuzasidan “qatʼiy nazorat va shaxsiy masʼuliyat” tamoyili joriy etilmoqda.

Muddatlarning kechikishiga emas, balki muammoning mazmunan hal etilishiga asosiy eʼtibor qaratilmoqda.

Murojaatlar bilan ishlash shunchaki javob xati yozish emas. Davlatimiz rahbarining koʻrsatmasiga koʻra, endi palataga kelib tushayotgan har bir murojaat boʻyicha tadbirkorning muammosi joyiga chiqqan holda oʻrganiladi.

Prezidentimiz qoʻygan talablar faoliyatimizdagi eng muhim mezonlar etib belgilandi. Ijro intizomiga qatʼiy rioya qilish va murojaatlarni oʻz vaqtida, sifatli hal etish orqali iqtisodiy oʻsishni taʼminlash barobarida xalqimizning, xususan, tadbirkorlarimizning davlatga ishonchini mus­tahkamlaymiz.

Birinchi chorak tahlili va ustuvor maqsadlar

Joriy yil 24-aprel kuni davlatimiz rahbari huzurida hududlar va tarmoqlarda iqtisodiy oʻsishni taʼminlashning birinchi chorak yakunlari hamda yil oxirigacha belgilangan ustuvor vazifalarga bagʻishlangan muhim yigʻilish boʻlib oʻtdi. Unda belgilangan topshiriqlar mamlakat iqtisodiyotining barqarorligini taʼminlashda davlat organlari bilan birga Savdo-sanoat palatasi kabi biznes hamjamiyati vakillari oldiga ham aniq talablarni qoʻydi.

Yigʻilishda taʼkidlanganidek, joriy yilning dastlabki uch oyi iqtisodiyotimiz uchun sinov va imkoniyatlar davri boʻldi. Tarmoqlar kesimida oʻsish surʼati tahlil qilinar ekan, asosiy eʼtibor ichki zaxiralarni safarbar etish va investitsiyaviy loyihalarni jadallashtirishga qaratildi.

Palata tizimi uchun bu davr tadbirkorlarning muammolarini tizimli oʻrganish va ularning eksport salohiyatini oshirish boʻ­yicha amaliy choralar koʻrish pallasi boʻldi. Biroq mamlakatimiz yetakchisi taʼkidlaganidek, erishilgan natijalar bilan cheklanib qolmay, hali ishga solinmagan ulkan salohiyatdan foydalanish zarur.

Yigʻilish yakunlaridan kelib chiqib, Savdo-sanoat palatasida yil yakuniga qadar qator yoʻnalishlarda vazifalar belgilab olindi.

Jumladan, har bir tuman va shaharning oʻziga xos ixtisos­lashuvidan kelib chiqib, yangi ishlab chiqarish quvvatlarini ishga tushirish koʻzda tutildi. Bunda palata tadbirkorlarga loyihaviy hujjatlarni tayyorlash va bozor topishda yaqindan koʻmak beradi.

Yirik sanoat korxonalari atrofida kichik va oʻrta biznes vakillarining kooperatsiya aloqalari kengaytiriladi. Bu mahalliylashtirish darajasini oshirishning eng samarali yoʻlidir.

Faqat anʼanaviy bozorlar bilan cheklanib qolmay, yangi va istiqbolli yoʻnalishlarga chiqish uchun tadbirkorlarni sertifikatlash va xalqaro standartlarga moslashtirish ishlari kuchaytiriladi.

Yigʻilishda Prezidentimiz iqtisodiy oʻsishga toʻsiq boʻlayotgan omillarni bartaraf etish boʻyicha qatʼiy koʻrsatmalar berdi. Savdo-sanoat palatasi faoliyatida bu topshiriqlar tadbirkorlikka xalal berayotgan byurokratik toʻsiqlarni doimiy monitoring qilish, biznes muhitini yaxshilash boʻyicha qonunchilikka takliflar kiritish, har bir investitsiya loyihasining taqdiri uchun masʼuliyatni his qilish demakdir.

Yil yakuniga qadar iqtisodiy koʻrsatkichlarning barqaror oʻsishini taʼminlash yangi ish oʻrinlari ochish, aholining daromadini oshirish va tadbirkorlarimizning farovonligiga xizmat qiladi.

Tadbirkorlar hayotidagi oʻzgarishlar

Soliq siyosatidagi islohotlar tufayli tadbirkorlar uchun soliq yuki qisqartirildi va hisob-kitob jarayoni soddalashtirildi. Masalan, ayrim turdagi soliq stavkalari pasaytirilishi va hisobot topshirish tizimining raqamlashtirilishi kichik biznes vakillari uchun katta yengillik berdi. Ilgari tadbirkor soliq hisobotini tayyorlash uchun alohida mutaxassis jalb qilishga majbur boʻlgan. Hozir elektron tizimlar orqali bu jarayon ancha osonlashdi.

Yana bir muhim oʻzgarish litsenziya va ruxsat berish tartib-taomillarining soddalashtirilishi boʻldi. Ilgari tadbirkor faoliyat boshlash uchun bir nechta idoraga murojaat qilishi, koʻp vaqt va resurs ­sarflashi talab etilar edi. Yangi tartiblar joriy etilishi tufayli esa koʻplab ruxsatnomalar bekor qilindi yoki “bir darcha” tamoyili asosida taqdim etiladigan boʻldi. Masalan, kichik ishlab chiqarish yoki xizmat koʻrsatish faoliyatini boshlash uchun zarur ruxsatnomalarni qisqa muddatda olish imkoni paydo boʻldi.

Moliyaviy qoʻllab-quvvatlash mexanizmlarining kengayishi ham tadbirkorlar uchun katta imkoniyatlar yaratmoqda. Jumladan, imtiyozli kreditlar, subsidiyalar va davlat kafolatlari orqali tadbirkorlar oʻz biznesini kengaytirish yoki yangi loyihalarni amalga oshirish imkoniga ega boʻlmoqda. Masalan, ishlab chiqarishni yoʻlga qoʻyishni rejalashtirayotgan tadbirkor past foizli kredit olish orqali uskunalar xarid qilib, faoliyatini boshlashi mumkin.

Bojxona va tashqi savdo sohasidagi yengilliklar ham eksport qiluvchi tadbirkorlar hayotida ijobiy oʻzgarishlar yaratdi. Eksport jarayonining soddalashtirilishi, ortiqcha tekshiruvlarning qisqartirilishi va logistikaga doir qulayliklar natijasida tadbirkorlar tashqi bozorlarga chiqishda kamroq toʻsiqqa duch kelmoqda. Masalan, mahalliy ishlab chiqaruvchi oʻz mahsulotini xorijga eksport qilishda hujjatlashtirish jarayonini tez va shaffof bajara oladi.

Shu bilan birga, tekshiruv tizimining tartibga solinishi ham tadbirkorlar faoliyatiga ijobiy taʼsir koʻrsatmoqda. Nazorat organlari tomonidan tekshiruvlar soni qisqartirilib, ularni oʻtkazish tartibi aniq belgilab qoʻyildi. Bu esa tadbirkorlarning ortiqcha bezovta qilinishiga chek qoʻyib, ularning asosiy eʼtiborini biznesni rivojlantirishga qaratish imkonini bermoqda.

Tadbirkorlar uchun qabul qilinayotgan qonun hujjatlari ularning kundalik fao­liyatini yengillashtirish, xarajatlarini kamaytirish va yangi imkoniyatlar ochishga xizmat qilmoqda. Bu esa, oʻz navbatida, tadbirkorlik faolligining oshishi, yangi ish oʻrinlari ochilishi va iqtisodiyotning barqaror oʻsishiga mustahkam zamin hozirlamoqda.

Biznesning jamiyat oldidagi masʼuliyati

Davlatimiz tomonidan hamda Savdo-sanoat palatasi koʻmagida biznes uchun koʻplab toʻsiqlar olib tashlandi, soliqlar optimallashtirildi.

Xoʻsh, bunga javoban tadbirkorlar ijtimoiy va iqtisodiy sohaga real hayotda qanday hissa qoʻshmoqda? Quyida buning aniq va hayotiy dalillarini koʻrib chiqamiz.

Birgina Uzum Market milliy marketpleysini olaylik. Davlat tomonidan AT va elektron tijorat sohasiga berilgan erkinliklar natijasida ushbu kompaniya qisqa muddatda ulkan logistika markazlarini qurdi. Ular butun boshli yangi savdo ekotizimini yaratdi. Chekka viloyatdagi oddiy hunarmand yoki kichik sex egasi oʻz mahsulotini butun Oʻzbekiston boʻylab sotish imkoniga ega boʻldi.

Kuryerlar, omborxona ishchilari, saralovchilar va AT mutaxassislari sifatida oʻn minglab yoshlar rasmiy ish bilan taʼminlandi. Ilgari bu yoshlarning koʻpi chet elga ish qidirib ketishga majbur edi.

Biznesga berilgan yengilliklar tadbirkorlarni soyadan chiqishga undadi. Buning eng yorqin namunasi “Korzinka” supermarketlar tarmogʻidir. Bu kompaniya xufiyona savdo (yashirin iqtisodiyot)dan voz kechib, 100 foiz ochiq tizimda ishlaydi. Natijada har yili davlat byudjetiga yuzlab milliard soʻm soliq toʻlaydi. Oʻz oʻrnida bu mablagʻ ijtimoiy-iqtisodiy sohalarning rivojlanishi uchun yoʻnaltiriladi.

Kompaniya nogironligi bor shaxslarni ishga qabul qilish boʻyicha dasturlarni muntazam amalga oshiradi. Shuningdek, Ramazon oyi va boshqa bayramlarda kam taʼminlangan oilalarga yirik miqdorda oziq-ovqat yordamlarini manzilli yetkazib beradi.

Bugungi tadbirkorlar faqat oʻz obyektini emas, atrof-muhitni ham obod qilmoqda. Davlatimiz rahbari tashabbusi bilan bosh­langan “Yashil makon” umummilliy loyihasi doirasida Murad Buildings, Golden House kabi yirik qurilish kompaniyalari va yuzlab mahalliy tadbirkorlar oʻz hisobidan minglab tup qimmatbaho manzarali daraxt koʻchatlarini sotib olib, shahar va tumanlarda yangi ekobogʻlar barpo etdi. Shuningdek, koʻplab tadbirkorlar oʻz korxonasi atrofidagi yoʻllarni asfalt qilib, bekatlar qurib, mahalla infratuzilmasini oʻzgartirmoqda.

Davlatimiz rahbari qoʻllab-quvvatlovi bilan yaratilgan sharoitlar tufayli tadbirkorlar bugun yirik ish beruvchi, davlat byudjetining asosiy donori va ijtimoiy muammolarni hal qiluvchi sherikka aylandi. Ular oʻzining real saʼy-harakatlari va barpo etayotgan tizimi orqali jamiyat farovonligiga katta hissa qoʻshib kelmoqda.

Yangi Oʻzbekiston taraqqiyotining harakatlantiruvchi kuchi

Hayotimizning barcha jabhasi kabi iqtisodiy sohada, ayniqsa, tadbirkorlikni rivojlantirish borasida ham muhim natijalar qoʻlga kiritilmoqda.

Jahonning ilgʻor tajribasiga tayangan holda zamonaviy va samarali boshqaruv vositalarini joriy etish orqali tadbirkorlikni qoʻllab-quvvatlash, ishbilarmonlik muhitini erkinlashtirish va biznes manfaatlarini eng ustuvor qadriyat sifatida taʼminlashga alohida eʼtibor qaratilmoqda.

Aynan hozir mamlakatimizda bu masalaga katta eʼtibor berilayotgani aslo bejiz emas. Chunki jahon xalqlari va zamonaviy ilgʻor mamlakatlar iqtisodiyotining natijadorligini, harakatchanligi va oʻsuvchanligini taʼminlash, sohani rivojlantirishda tadbirkorlikning oʻziga xos oʻrni borligi allaqachon isbotlangan.

U taraqqiy etgan mamlakatlar hayotining asosiy elementlaridan va yurtimiz iqtisodiyoti uchun ham eng muhim omillardan biri sifatida samaradorligini koʻrsatmoqda. Bu borada mamlakatimizda tadbirkorlik sohasiga oid baʼzi raqamlar va dalillarni keltirishning oʻziyoq ushbu fikrni yaqqol isbotlaydi.

Bugun tadbirkorlik harakati Oʻzbekis­ton jamiyatining oʻziga xos, iqtisodiy jihatdan mustahkam yangi ijtimoiy qatlamiga va yangi Oʻzbekiston taraqqiyotining harakatlantiruvchi kuchiga aylandi.

Tadbirkorlik harakati mamlakatimizning eng sara qatlamlari vakillarini qamrab olayotir. Chunki avvallari iqtisodiyotning sanoqli yoʻnalishlarida, asosan ishlab chiqarish va savdo sohalari tadbirkorlik sifatida tushunilgan boʻlsa, hozir tadbirkorlikning geografiyasi ancha kengaygan.

Xullas, tadbirkorlik jamiyatning barcha jabhasida oʻz oʻrniga ega boʻlib bormoqda. Axborot texnologiyalari, tibbiyot, taʼlim, sanʼat, kinematografiya va hatto ijtimoiy tarmoqlar ham biznesning bir koʻrinishi. Bu iqtisodiyot uchun ham, jamiyat uchun ham ijobiy jihatlarini koʻrsatmoqda.

Endi tadbirkorlik shunchaki daromad olish bilan cheklanib qoladigan faoliyat turi boʻlib qolmay, ijtimoiy-iqtisodiy sohadagi boshqa yoʻnalishlarni ham rivoj­lantirishga turtki boʻladigan muhim sohaga aylanmoqda.

Davlatimiz rahbarining tadbirkorlikka qaratayotgan eʼtibori tufayli har bir idora va tashkilot biznes sohasini rivoj­lantirishga masʼulligi belgilandi.

Yana bir muhim jihat shuki, Prezidentimiz taʼbiri bilan aytsak, tadbirkorlik, ishbilarmonlik, avvalo, yoshlarga xos fazilatdir.

Demak, tadbirkorlikka yoʻl ochish, ­avvalo, yoshlarga keng yoʻl ochib berish va bu boradagi islohotlar ham yoshlarning farovon kelajagi uchun, ham biznes istiqboli, jahon bozoriga mahalliy mahsulotlarni olib chiqishning puxta oʻylangan samarasi, desak mubolagʻa boʻlmaydi.

Bularning barchasi Prezidentimizning ushbu sohaga alohida eʼtibor qaratgani, ayni jabhada islohotlarning aniq strategiyasi amalga oshirilayotgani bilan izohlanadi. Jumladan, bundan ikki yil oldin nihoyatda yaxshi tajriba — Tadbirkorlar kuni arafasida Prezidentimizning eng ilgʻor tadbirkorlar bilan ochiq muloqot shaklidagi uchrashuvlari, yaʼni toʻplanib qolgan masalalarga birgalikda yechim topish amaliyoti yoʻlga qoʻyilgani va ushbu anʼana davom ettirilayotgani buning yaqqol dalilidir.

Prezidentimiz taʼkidlaganidek, soʻng­gi 7-8 yilda xalqaro maydonda boʻlayotgan oʻzgarishlar dunyo iqtisodiyotiga, jumladan, milliy iqtisodiyotimizga ham katta taʼsir oʻtkazmoqda.

Turli ziddiyatlar tufayli logistika va mahsulot yetkazib berish zanjiri uzilgani, hamkor mamlakatlar valyutasi qadrsizlangani, global miqyosda inflyatsiya darajasi yuqori boʻlib qolayotgani oqibatida moliyaviy resurslar qimmatlashgani kabi omillar taʼsirini soha vakillari sezib turibdi.

Bunday murakkab sharoitda muammolarni bevosita biznes vakillarining oʻzidan eshitib, ularga birgalikda yechim topish va shu orqali tezkor qaror qabul qilish eng toʻgʻri yoʻl ekanini hayotning oʻzi isbotlab berdi.

Yagona “texnologik zanjir” tamoyili

Tadbirkorlar kuni arafasida oʻtkazilgan uchrashuv yakunlari boʻyicha davlatimiz rahbarining 2025-yil 19-avgustdagi “Oʻzbekiston Respublikasi Prezidentining tadbirkorlar bilan V ochiq muloqotida belgilangan vazifalarni amalga oshirish chora-tadbirlari toʻgʻrisida”gi farmoni alohida ahamiyat kasb etadi.

Mazkur hujjatda belgilangan vazifalarning izchil va oʻz vaqtida ijrosini taʼminlash orqali tadbirkorlik faoliyatidagi tizimli muammolarni bartaraf etish, biznes yuritish sharoitlarini yanada yengillashtirish hamda yangi imkoniyatlar yaratishga qaratilgan aniq chora-tadbirlar belgilab berilgan.

Farmon ijrosini taʼminlash doirasida masʼul vazirlik va idoralar kesimida aniq vazifalar, muddatlar va ijro mexanizmlarining belgilanishi, shuningdek, doimiy monitoring va nazorat tizimining yoʻlga qoʻyilishi qabul qilingan qarorlarning amaldagi samaradorligini oshirishga xizmat qilmoqda. Ayniqsa, tadbirkorlar koʻtargan muammolarning manzilli hal etilishi, maʼmuriy toʻsiqlarni qisqartirish va davlat xizmatlarini soddalashtirish kabi yoʻnalishlarda qilinayotgan ishlar ijobiy natijalar bermoqda.

Shu jihatdan mazkur farmon nafaqat strategik vazifalarni belgilab beruvchi hujjat, balki ularning amaliy ijrosini taʼminlash orqali tadbirkorlar hayotida real oʻzgarishlarni taʼminlayotgan muhim mexanizm sifatida namoyon boʻlmoqda.

Hujjat bilan 7 ta ustuvor yoʻnalish boʻyicha kompleks chora-tadbirlar belgilab berildi. Xususan, tadbirkorlikni moliya­viy qoʻllab-quvvatlash, soliq tizimini takomillashtirish, turizm va xizmatlar sohasini rivojlantirish, biznes uchun maʼmuriy toʻsiqlarni qisqartirish kabi muhim yoʻnalishlar qamrab olingan.

Mazkur farmon tadbirkorlikni qoʻllab-quvvatlash yoʻlida mustahkam huquqiy poydevor yaratib berdi. Unga muvofiq, sohada 23 ta qonun, 6 ta farmon, 19 ta qaror hamda hukumatning 29 ta qarorini ishlab chiqish belgilandi. Bu keng qamrovli islohotlar meʼyoriy bazani takomillashtirish bilan birga tadbirkorlik muhitini mutlaqo yangi bosqichga olib chiqishga xizmat qilmoqda.

Natijada yurtimizda ishbilarmonlik muhiti yanada jozibador tus olib, yangi loyi­halarga keng yoʻl ochilmoqda, investitsiyaviy faollik ortib bormoqda. Eng asosiysi, tadbirkor iqtisodiyot tayanchi sifatida eʼtirof etilib, uning manfaatlari amalda ishonchli himoya qilinmoqda.

Zamonaviy boshqaruv amaliyotida ijro intizomi faqat topshiriqlarni bajarish emas, balki ularning natijadorligiga erishishni ham nazarda tutadi. Shu maʼnoda, ijro jarayonini tashkil etishda yagona “texnologik zanjir” tamoyili muhim ahamiyat kasb etadi.

Davron VAHOBOV,

Savdo-sanoat palatasi raisi