Шу муносабат билан бугун Темурийлар тарихи давлат музейига ҳам кўплаб юртдошларимиз ва хорижий сайёҳлар ташриф буюриб, янгиланган экспозиция билан яқиндан танишди. Ташриф буюрувчилар замонавий технологиялар асосида бойитилган тарихий кўргазмалар, интерактив лойиҳалар ва ноёб экспонатларга катта қизиқиш билдирди.

Темурийлар тарихи давлат музейи мустақиллик йилларида халқимизнинг бой тарихий ва маънавий меросини асраб-авайлаш ҳамда кенг тарғиб этишда муҳим илмий-маърифий масканга айланди. Музейнинг асосий мақсади Амир Темур ва темурийлар давридаги илм-фан, маданият ва давлатчилик тарихини ҳаққоний ёритиш, ёш авлодни ватанпарварлик руҳида тарбиялашдан иборат.

Музей яқинда бутунлай янги концепция асосида реконструкция қилиниб, замонавий технологиялар билан бойитилди. Экспозицияда аватарлар, ЛEД экранлар, проэксион технологиялар, интерактив киосклар ва иммерсив шоу хоналари орқали Амир Темур ва Темурийлар даври тарихи замонавий усулда намойиш этилмоқда. Айниқса, сунъий интеллект асосида жонлантирилган тарихий образлар ҳам ташриф буюрувчиларда катта таассурот қолдирмоқда.

Музейнинг марказий қисмида “Буюк Соҳибқирон — Иккинчи Ренессанс асосчиси” композицияси янгича мазмун билан бойитилган. Шунингдек, экспозицияда Амир Темурнинг давлат бошқаруви, ҳарбий санъати, дипломатик алоқалари, илм-фан ва маданият ривожига қўшган ҳиссаси кенг ёритилган. Темурийлар даврига оид ноёб қурол-аслаҳалар, тарихий қўлёзмалар, миниатюралар ва археологик топилмалар ҳам намойиш этилган.

Музейда болалар учун махсус интерактив хона ҳам ташкил этилган бўлиб, унда тарихий ўйинлар, рақамли бўяш ва шахмат майдончалари яратилган. Бу эса ёшларнинг тарихга қизиқишини оширишга хизмат қилмоқда.

Туркиянинг Бурса шаҳридан ташриф буюрган сайёҳлар Мерве Кайрак ва Жиҳан Кайрак ҳам музей ҳақидаги илиқ таассуротлари билан ўртоқлашди. Уларнинг айтишича, улар Бурсада адвокат бўлиб фаолият юритади ва Ўзбекистонга илк бор ташриф буюрган. Сайёҳлар аввал Самарқанд ва Бухоро шаҳарларини айланиб, сўнг Тошкентга келишганини айтиб ўтди.

— Ўзбекистоннинг ҳар бир маскани бизда унутилмас таассурот қолдирди. Айниқса, музейларингиз жуда бой ва замонавий экан. Темурийлар тарихи давлат музейи бизга алоҳида ёқди. Бу ерга яна, албатта, фарзандларимиз билан бирга келишни истаймиз, — деди улар.

Темурийлар тарихи давлат музейи илмий ишлар бўйича директор ўринбосари, Шаҳноза Миралиева музейнинг бугунги аҳамияти ҳақида шундай деди:

— Музей 30 йил давомида Амир Темур ва темурийлар даври тарихини чуқур ўрганиш, тарғиб қилиш ва кенг жамоатчиликка етказишда муҳим илмий-маърифий марказга айланди. Янгиланган экспозицияда замонавий технологиялар орқали бой тарихий меросимизни янада таъсирчан ва интерактив тарзда намойиш этишга эришилди.

304-мактаб ўқувчиси Шухратов Иброҳим ҳам музейдан олган таассуротлари билан ўртоқлашди.

— Темурийлар тарихи давлат музейига келганим менга жуда ёқди. Ўзимни худди тарих ичига тушиб қолгандек ҳис қилдим. Бу ерда Амир Темурнинг ҳаёти, жанглари, “Темур тузуклари”, соҳибқирон ва унинг аскарлари қандай кийингани, қандай таомлар истеъмол қилгани ҳақида жуда кўп маълумотларга эга бўлдим. Шунингдек, тарихий урушлар ва ўша давр воқеалари ҳам жуда қизиқарли тарзда намойиш этилган экан.

Бу музейга нафақат болалар, балки катталар ҳам албатта келишини тавсия қиламан. Айниқса, хорижий сайёҳлар ташриф буюрса, бу ердан катта таассурот ва бой тарихий билим билан қайтади. Музей инсоннинг тарихга бўлган қизиқишини янада оширади, — деди у.

Бугунги очиқ эшиклар куни доирасида музейдаги гавжум муҳит, юртдошларимиз ва сайёҳларнинг катта қизиқиши тарихий меросимизга бўлган эътибор тобора ортиб бораётганини яна бир бор намоён этди.

Зулхумор Акбарова,

Мадина Ботиржонова