Жорий йилнинг 9 июнь куни “Тошкент минтақавий темир йўл узели” филиалининг Тошкент темир йўл масофаси корхонаси 20-цех механизациялашган бригадаси темир йўл созловчиси Аъзам Иброгимов хизмат вазифасини бажариш жараёнида ҳақиқий жасорат намунасини кўрсатди.
У Сергели тумани ҳудудидан ўтувчи Қорасув канали атрофида иш олиб бораётган вақтида канал оқимида оқиб кетаётган ва ёрдам сўраб чақириқ қилган икки нафар қизчани кўриб қолади. Воқеа жойида тезкор қарор қабул қилган темирйўлчи дарҳол каналга тушиб, кучли оқим таъсирида хавфли вазиятга тушиб қолган болани қутқариб қолди.
Аъзам Иброгимовнинг жасорати ва фидокорона ҳаракати юксак баҳоланиб, “Ўзбекистон темир йўллари” АЖ раҳбарияти томонидан унга ташаккурнома, эсдалик совғаси ҳамда пул мукофоти топширилди.
