Соғлиқни сақлаш вазирлигининг хабар беришича, вазир Элдор Адилов иштирокида ўтказилган танқидий-таҳлилий йиғилишда тиббиёт муассасаларининг қиш мавсумига тайёргарлиги муҳокама қилинган. Унда мавжуд камчиликлар ҳам танқидий кўриб чиқилган.

Вазирлик маълумотларига кўра, бугун мамлакатда 3 600 дан зиёд давлат тиббиёт муассасаси фаолият юритмоқда. Мавсумга тайёргарлик доирасида 56,9 минг тонна кўмир захира қилинган. Маънан эскирган 156 та иситиш қозонини алмаштириш ва таъмирлаш ишлари тўлиқ якунланган.

Бироқ ўрганишлар давомида айрим ҳудудларда камчиликлар аниқланган. Жумладан, Қорақалпоғистон Республикаси ва Фарғона вилоятидаги айрим тиббиёт муассасаларида таъмирлаш ишлари белгиланган муддатда тугалланмаган.

Вазирлик қайд этишича, Кўкдала, Яккабоғ, Бандихон, Бекобод ва Бўка туманларидаги айрим оилавий поликлиника ҳамда оилавий шифокор пунктларида кўмир захиралари очиқ ҳавода сақланмоқда. Шаҳрихон туманидаги 66-оилавий поликлиникада эса иситиш тизими ҳануз ишга туширилмаган.

Бундан ташқари, бир қатор тиббиёт объектлари марказлашган иссиқлик таъминоти тизимига уланмаган. Жумладан, Жиззах вилоятида 6 та, Қашқадарё ва Хоразмда 3 тадан, Сурхондарё ва Тошкент вилоятларида 2 тадан, Андижон, Самарқанд ва Фарғона вилоятларида эса биттадан объект шундай муаммога эга.

Шунингдек, Андижон, Сурхондарё, Сирдарё, Фарғона, Жиззах, Наманган ва Самарқанд вилоятларидаги 15 та соғлиқни сақлаш объекти қозонхоналарида саноат хавфсизлиги талаблари бузилган. Айрим муассасаларда қўлбола қозонлардан фойдаланилаётгани ҳам аниқланган.

Йиғилишда вазир барча тиббиёт муассасаларида иссиқлик ва электр таъминоти узлуксизлигини таъминлаш зарурлигини таъкидлаган. Масъулларга қозонхоналарнинг техник созлигини таъминлаш, генераторларни доимий шай ҳолатда сақлаш, муқобил энергия манбаларидан фойдаланиш ва етарли ёқилғи захирасини шакллантириш бўйича топшириқлар берилган.

Вазирликнинг маълум қилишича, камчиликларга йўл қўйган айрим раҳбарларга нисбатан интизомий жазо чоралари қўлланилган.

Йиғилишда «Яшил макон» умуммиллий лойиҳаси доирасидаги ишлар ҳам муҳокама қилинган. Жорий йил куз мавсумида соғлиқни сақлаш объектлари ва уларга туташ ҳудудларда 836,1 минг туп кўчат экиш белгиланган бўлса-да, бу вазифа ҳали тўлиқ бажарилмаган. Айниқса, Наманган, Сирдарё ва Самарқанд вилоятларидаги ишлар сустлиги танқид қилинган.

Якунда мавжуд камчиликларни бартараф этиш ва қиш мавсумига тайёргарликни тўлиқ якунлаш бўйича масъулларга топшириқлар берилган.