Пойтахт мактабларида ўқувчиларнинг мактабга хавфсиз ва қулай қатновини ташкил этиш мақсадида мактаб автобуслари — Счоол Бус тизимини йўлга қўйиш бўйича амалий ўрганиш ишлари бошланди.
Бунинг учун, аввало, ота-оналарнинг эҳтиёжи, ўқувчиларнинг мактабга қандай қатнаши ҳамда келгусида автобус йўналишларини шакллантириш учун зарур маълумотлар ўрганилмоқда.
Айни вақтга қадар сўровнома Тошкент шаҳридаги 328 та мактабнинг ўқувчи сони кўп бўлган ва дастлабки ҳисоб-китобларга Счоол Бус тизимига талаб даражаси юқори деб баҳоланган 29 тасида ўтказилди. Унда 58 369 нафар ўқувчининг оила аъзолари ёки васийлари иштирок этди.
Дастлабки натижаларга кўра, ўқувчиларнинг:
— 38,5 фоизи мактабга пиёда келади;
— 33,1 фоизи ота-оналари томонидан шахсий автомобилда олиб келинади;
— 18,3 фоизи автобусдан фойдаланади;
— 5,7 фоизи таксидан фойдаланади;
— 3,5 фоизи метро орқали қатнайди;
— 0,9 фоизи микромобил воситалардан фойдаланади.
Энг муҳим кўрсаткич — сўровнома иштирокчиларининг 73,5 фоизи мактаблар учун махсус автобус қатновларини ташкил этиш истагини билдирган.
Мазкур натижа пойтахтда Счоол Бус тизимига юқори эҳтиёж мавжудлигини кўрсатмоқда.
Сўровнома қолган мактабларда ҳам босқичма-босқич давом эттирилади. Якуний натижалар асосида ўқувчилар оқими, йўналишлар, эҳтиёж мавжуд автобуслар сони, ҳаракат жадвали, хавфсиз тушириш ва олиб кетиш нуқталари ҳамда бошқа ташкилий масалалар батафсил ўрганилади.
Шундан сўнг Счоол Бус тизимини жорий этишнинг амалий имкониятлари ишлаб чиқилиб, тегишли ташкилотлар билан келишилган ҳолда уни босқичма-босқич йўлга қўйиш масаласи кўриб чиқилади.
Барча ота-оналарни сўровномада фаол иштирок этишга таклиф қиламиз. Сизнинг жавобларингиз мактабларнинг Счоол Бус эҳтиёжи даражасини, ундан қанча ўқувчи фойдаланиши мумкинлигини, зарур автобуслар сони ва йўналишларни аниқлашда муҳим аҳамиятга эга.
