Лойиҳа доирасида Тошкент Сайилгоҳи, унга туташ хиёбонлар, яшил ҳудудлар, пиёдалар йўлаклари ва шаҳар инфратузилмаси объектларини комплекс ривожлантириш режалаштирилган.
Қайд этилишича, Сайилгоҳ кўчаси — Тошкент Бродвейи пойтахтнинг энг машҳур сайр масканларидан бири ҳисобланади. Бу ерда тарихан рассомлар, мусиқачилар, шаҳар аҳолиси ва меҳмонлари иштирокида жонли кўча муҳити шаклланган.
Мутахассислар таҳлилига кўра, ҳудуд нафақат пиёдалар қисми, балки унга туташ яшил майдонлар, ўтиш йўлаклари, ёритиш тизими, ирригация ва ташқи инфратузилмани ҳам босқичма-босқич янгилашни талаб қилмоқда.
Лойиҳа Ягона дизайн-код ва ҳудудни комплекс ривожлантириш тамойиллари асосида амалга оширилади. Тайёргарлик жараёнида аҳоли ва мутахассислар таклифлари ҳам ўрганилади.
Таъкидланишича, ҳудуд очиқ шаҳар муҳити хусусиятини сақлаб қолади. Кўча рассомлари ва ижодий жамоатчилик вакиллари мазкур маконнинг ажралмас қисми бўлиб қолаверади.
Лойиҳа доирасида йўл ва пиёдалар йўлаклари қопламасини янгилаш, пиёдалар ҳаракатини яхшилаш, тўсиқсиз муҳит яратиш, ёритиш тизимини модернизация қилиш, кўкаламзорлаштириш ва ирригация тармоқларини ривожлантириш ишлари амалга оширилади.
Шунингдек, фавворалар реконструкция қилиниб, ўриндиқлар, чиқинди қутиси ва бошқа кичик архитектура шакллари ўрнатилади. Пешлавҳа ва рекламалар Ягона дизайн-код талаблари асосида тартибга келтирилади, ноқонуний қурилмалар эса демонтаж қилинади.
Жамоат хавфсизлигини таъминлаш мақсадида видеокузатув ва мониторинг тизимларини жорий этиш ҳам режалаштирилган.
Маълум қилинишича, ҳудуддаги мавжуд дарахтлар мутахассислар назоратида кўрикдан ўтказилмоқда. Шу билан бирга, камида 1000 туп янги дарахт, бута ва манзарали ўсимлик экиш режалаштирилган.
Лойиҳанинг асосий мақсади — ҳудуднинг ўзига хос муҳити ва қиёфасини сақлаб қолган ҳолда, уни пойтахт аҳолиси ва меҳмонлари учун янада қулай, яшил ва хавфсиз масканга айлантиришдан иборат.
