Вилоят ИИББ маълумотига кўра, 1978 йилда Олмалиқ шаҳрида туғилган Павел Ким фуқароларга «молиявий ёрдам» кўрсатиш ниқоби остида фирибгарлик қилганликда гумонланмоқда.
Жумладан, у бир фуқарога 1 минг АҚШ доллари қарз бериб, гўёки 10 минг доллар олгани ҳақида тилхат ёздириб олган. Орадан маълум вақт ўтгач, ушбу тилхатни асос қилиб фуқаролик судига мурожаат қилган ва қарздордан 10 минг доллар ундириш ҳақида суд қарори чиқарилишига эришган.
Шу тариқа, жабрланувчиларнинг ҳар ойлик иш ҳақидан маблағлар ундирилиб, гумонланувчининг манфаатига йўналтирилган.
Тергов доирасида унинг яшаш хонадони ва иш офиси кўздан кечирилган. Натижада фуқароларга тегишли 100 га яқин тилхат, 55 та уй-жойнинг кадастр ҳужжатлари, битта пневматик қурол ҳамда Мажбурий ижро бюросининг қарийб 50 нафар фуқародан пул ундиришга оид ҳужжатлари аниқланган.
Ҳозиргача ундан жабр кўрган 65 нафар фуқаронинг аризаси қабул қилинган.
Мазкур ҳолат юзасидан Павел Кимга нисбатан Жиноят кодексининг 168-моддаси 4-қисми «а» банди (жуда кўп миқдорда фирибгарлик), 188-моддаси 1-қисми ҳамда 205-моддаси 2-қисми «а» банди билан жиноят иши қўзғатилган. У процессуал тартибда ушланган ва суд қарори билан унга нисбатан қамоққа олиш эҳтиёт чораси қўлланилган.
Айни пайтда тергов ҳаракатлари давом эттирилмоқда.
Қайд этиш жоизки, мазкур ҳолат Ички ишлар вазирлиги томонидан республика бўйлаб ўтказилаётган «Хавфсиз ва соғлом юрт» тезкор-профилактик ойлигининг учинчи босқичи доирасида фош этилган.
