Ҳодиса хонадонбай ўрганиш ишлари давомида аниқланган. Ички ишлар ходими шубҳали хонадонни текшириш жараёнида жиноий гуруҳ аъзолари томонидан унга 1 минг доллар пора таклиф қилинганини маълум қилди. Бироқ ходим таклифни рад этиб, ҳолат юзасидан тегишли чоралар кўрган.
«Холислар иштирокида уйни текширганимизда, ҳар бир хонада тўрт-беш нафардан фуқаро борлиги аниқланди. Уларни жамлаганимизда, жами 23 нафар хорижий фуқаро бу ерда ноқонуний яшаётгани маълум бўлди», — дейди ички ишлар ходими.
Шундан сўнг Тошкент шаҳар Ички ишлар бош бошқармаси ҳамда Кибержиноятларга қарши курашиш бошқармаси ходимлари томонидан тезкор тадбир ўтказилди.
Тадбир давомида хонадондан 80 та уяли алоқа воситаси, 21 та ноутбук, 6 та Wi-Fi роутери ва 22 та паспорт ашёвий далил сифатида расмийлаштириб олинди.
Шунингдек, гуруҳнинг криптоактивлар билан боғлиқ фаолияти ҳам аниқланди. Хусусан, уч нафар хорижий фуқаро белгиланган тартибда лицензия олмасдан, интернет-криптобиржалари орқали такроран криптоактивлар олди-сотдисини амалга оширгани маълум бўлди.
Уларнинг криптоактивлар айланмаси жами 27 910,21 USDTни, яъни тахминан 329,6 миллион сўмни ташкил этган.
Мазкур ҳолат юзасидан Яккасарой туманидаги тегишли тергов органи томонидан Жиноят кодексининг 278⁸-моддаси иккинчи қисми тегишли бандлари билан жиноят иши қўзғатилган. Ҳозирда дастлабки тергов ҳаракатлари давом этмоқда.
Ушбу тезкор тадбир натижасида фирибгарлик схемалари орқали фуқароларнинг мол-мулкини қўлга киритишга қаратилган яширин марказ фаолиятига чек қўйилди.
