Бу ҳақида Болалар омбудсмани маълум қилди.

Қайд этилишича, Болалар омбудсмани котибиятига бир гуруҳ фуқаролар мурожаат қилиб, қўшниси А.Т. (1989 йилда туғилган) вояга етмаган фарзанди А.И. (2023 йилда туғилган)га нисбатан мунтазам равишда жисмоний зўравонлик қилаётгани, унга ухлатувчи дори воситаси бериб, доимий равишда қаровсиз ва парваришсиз қолдираётганидан шикоят қилган.

Болалар омбудсманининг расмий сўрови асосида ҳолат Ички ишлар бошқармаси ва Ижтимоий ҳимоя миллий агентлиги томонидан ўрганилган.

Ўрганиш натижасида болага нисбатан муттасил тазйиқ ва қийнаш ҳаракатлари юзасидан Ўзбекистон Республикаси Жиноят кодексининг 110-моддаси (қийнаш) билан жиноят иши қўзғатилган. Шунингдек, болага нисбатан ҳимоя ордери расмийлаштирилган.

Ҳозирда А.И.нинг саломатлигини тиклаш мақсадида зарур тиббий муолажалар кўрсатилмоқда. Боланинг соғлиги барқарор яхши ҳолатда экани маълум қилинди.

Шунингдек, туман васийлик органи томонидан боланинг қонуний манфаатларидан келиб чиқиб, вақтинча васийлик таъминланган.

А.Т.нинг ота-оналик мажбуриятларини бажармагани сабабли уни оналик ҳуқуқидан маҳрум қилиш бўйича судга тақдим этиш учун тегишли ҳужжатлар тайёрланмоқда.

Болалар омбудсмани боланинг хавфсиз ва соғлом муҳитда яшашини таъминлаш мақсадида мазкур ҳолатни кузатишда давом этади.