Маълум бўлишича, тадбиркорлар ушбу масалада амалий ёрдам сўраб Ўзбекистон Республикаси Президенти ҳузуридаги Бизнес-омбудсманга мурожаат қилган.
Ўрганишлар давомида «Ҳудудий электр тармоқлари» АЖ Тошкент шаҳар филиали томонидан техник шартлар қонун ҳужжатлари талабларига зид равишда берилгани аниқланган. Шу сабабли тадбиркорларнинг лойиҳа ҳужжатларини келишиш ваколатига эга орган томонидан рад этилган.
Амалдаги қоидаларга кўра, сўралаётган қувватга қараб техник шартлар «Ҳудудий электр тармоқлари» АЖ ёки унинг ҳудудий филиаллари томонидан Давлат хизматлари марказлари ёки Ягона интерактив давлат хизматлари портали орқали берилиши керак.
Шунингдек, «Электр энергиясидан фойдаланиш» қоидаларида «Ҳудудий электр тармоқлари» АЖ истеъмолчиларнинг электр тармоқлари ва қурилмаларини ўз ҳудудий электр тармоқларига улаш бўйича техник шартлар бериши белгиланган.
Аниқланган қонунбузилиш ҳолатлари юзасидан «Ҳудудий электр тармоқлари» АЖ Тошкент шаҳар филиали раҳбариятига расмий тақдимнома киритилди.
Натижада 40 га яқин тадбиркорлик субъектининг техник шарт олиш ва лойиҳа ҳужжатларини келишиш билан боғлиқ мурожаатлари ижобий ҳал этилди.
