Осиё футбол конфедерацияси (AFC) маълум қилишича, мусобақани ташкил этиш қўмитаси, Саудия Арабистони футбол федерацияси ва маҳаллий ташкилий қўмита билан ўтказилган музокаралардан сўнг шундай қарор қабул қилинган.
Дастлаб турнир 2027 йил 7 январдан 5 февралга қадар ўтказилиши режалаштирилган эди.
Мусобақа саналарининг ўзгартирилишига минтақадаги вазият билан боғлиқ фавқулодда ҳолатлар, жумладан, логистикадаги жиддий мураккабликлар ва сафарлардаги узилишлар сабаб бўлган.
AFC таъкидлашича, мусобақани дастлаб белгиланган муддатларда ташкил этиш ва ўтказиш учун фавқулодда шароитлар юзага келган. Шу боис турнирни кўчириш иштирокчи жамоалар, расмийлар, томошабинлар ва бошқа манфаатдор томонлар учун мақбул қарор ҳисобланади.
Турнирнинг янги саналарини FIFA тасдиқлаши керак.
AFC Саудия Арабистони футбол федерацияси ва маҳаллий ташкилий қўмитанинг Осиё футболчилари ва мухлислари учун юқори даражадаги мусобақа ўтказиш борасидаги саъй-ҳаракатларини эътироф этди.
Конфедерация мусобақани ташкил этишда иштирокчи мамлакатлар футбол ассоциациялари, ҳомийлар, трансляция ва тижорат ҳамкорлари билан яқин ҳамкорликни давом эттиришини билдирди.
Мусобақа бўйича қўшимча маълумотлар AFCнинг расмий каналлари орқали эълон қилинади.
