Оқибатда икки нафар бола вафот этган, аёл ҳамда унинг икки фарзанди турли даражадаги куйиш жароҳатларини олган. Судланувчи умрбод озодликдан маҳрум қилинди.
Жорий йилнинг 15 май куни ярим тунда Ғузор тумани Тинчлик маҳалласидаги хонадонлардан бирида ёнғин содир бўлди. Ёнғин вақтида уйда бўлган она ва унинг тўрт нафар вояга етмаган фарзанди олов ичида қолди.
Суд ҳужжатларига кўра, судланувчи мазкур хонадонга қўшни уйда ижарада яшаб, кунлик ишларда ишлаб келган. Ҳодиса содир бўлган куни у ишдан қайтаётганда спиртли ичимлик истеъмол қилиб, уйига келган.
У қўшни уй олдида тўхтаб, аёлдан ижарачи келган-келмаганини сўраган. Аёл билмаслигини айтгач, эркак унинг паспорти ва телефони қаердалигини сўраган. Паспорт баҳонасида келиб чиққан жанжал вақтида эркак аёлни ёқиб юбориш билан таҳдид қилган.
Аёл буни жиддий қабул қилмаган ва фарзандлари билан кечки овқатга ўтирган. Бироз вақт ўтгач, судланувчи беш литрлик идишда олиб келган бензинни аёл ва болаларнинг устига сепиб, гугурт чаққан.
Бир зумда уй аланга ичида қолган. Она ва болалар атрофдагилардан ёрдам сўраб бақирган.
Оқибатда олти ёшли бола ва 11 ёшли қиз вафот этган. Аёлнинг ўзи ва қолган икки фарзанди турли даражадаги куйиш жароҳатларини олиб, шифохонада даволанган.
Судда жиноят иши бўйича тўпланган ҳужжатлар, гувоҳларнинг кўрсатмалари ва ҳодиса тафсилотлари кўриб чиқилди. Судланувчининг айби тўлиқ тасдиқланди.
Аёл суддан судланувчига адолатли жазо тайинлашни сўради.
Суд Ўзбекистон Республикаси Жиноят кодексининг 97-моддаси 2-қисми «а», «в», «д» ва «ж» бандлари билан судланувчига умрбод озодликдан маҳрум қилиш жазосини тайинлади.
Суд ҳукмига кўра, судланувчи умрининг охиригача қамоқда қолади.
