Экология ва иқлим ўзгариши миллий қўмитасининг маълум қилишича, миллий ҳаво сифати индекси бўйича шаҳарнинг ўртача кўрсаткичи PM2.5 заррачалари учун «сариқ», PM10 заррачалари учун эса «зарғалдоқ» даражада бўлди.
Тунда ҳаво ҳароратининг кескин пасайиши, шамолнинг кучсизлиги ва кучли ҳарорат инверсияси атмосферанинг қуйи қатламларида ҳаво алмашинувини чеклади. Натижада PM2.5 ва PM10 заррачалари ер юзасига яқин қатламда тўпланиб, ҳаво ифлосланиши тун давомида ва эрталаб юқори даражада сақланиб қолди.
Метеосат сунъий йўлдоши тасвирларига кўра, 26 октябрь соат 00:00 дан 08:00 гача Тошкент шаҳри ва унга туташ ҳудудларда ҳавода чанг кузатилган.
Шунингдек, тун давомида махсус мобил лаборатория ёрдамида атмосфера ҳавоси ҳолати инструментал ўлчанди. Кузатув пунктларининг аксариятида PM2.5 майда дисперс заррачалари билан ифлосланиш даражаси халқаро AQI бўйича «носоғлом» ва «жуда носоғлом» тоифаларига мос келиши қайд этилди.
Бугун кун давомида ҳаво сифати халқаро AQI бўйича «носоғлом», миллий индекс бўйича эса «сариқ» даражада сақланиши кутилмоқда.
Айни пайтда атмосфера ҳавоси сифати махсус комиссия томонидан доимий мониторинг қилиб борилмоқда.
