Соғлиқни сақлаш вазирининг биринчи ўринбосари Отабек Имамов Япониянинг нуфузли «Kitahara Group» компанияси раҳбари Сигэми Китахара бошчилигидаги делегация билан учрашув ўтказди.
Мулоқот чоғида Ўзбекистон ва Япония ўртасида соғлиқни сақлаш соҳасидаги ҳамкорликни янада ривожлантириш, тиббиётнинг устувор йўналишлари бўйича тажриба алмашиш ҳамда истиқболли қўшма лойиҳаларни амалга ошириш масалалари муҳокама қилинди.
Таъкидланишича, «Kitahara Group» профилактика, ташхислаш, даволаш, нейрохирургия, шошилинч тиббий ёрдам ва реабилитация хизматларини ягона тизим асосида ташкил этиш бўйича катта тажрибага эга. Компаниянинг замонавий шифохоналар ташкил этиш борасидаги халқаро тажрибаси Ўзбекистон учун ҳам қизиқиш уйғотмоқда.
Шу муносабат билан компаниянинг Тошкент шаҳрида замонавий хусусий кўп тармоқли шифохона барпо этиш ва инновацион ёндашувлар асосида реабилитация хизматларини йўлга қўйиш ташаббуси қўллаб-қувватланди.
Учрашувда, шунингдек, компаниянинг инсультдан кейинги тикланиш, нейрореабилитация, беморларни даволаш ва шифохонадан кейинги парвариш бўйича тажрибасини Ўзбекистонда жорий этиш имкониятлари кўриб чиқилди.
Маълум қилинишича, «Kitahara Group» томонидан қўлланилаётган замонавий реабилитация усуллари натижасида инсультни бошдан кечирган беморларнинг 77 фоизи бир ой ичида сезиларли даражада тикланишга эришмоқда.
Томонлар мазкур илғор тажрибани мамлакатимизда жорий этиш истиқболлари ва бу борада амалга оширилиши лозим бўлган чора-тадбирларни муҳокама қилди.
