Ҳодиса 2 июль куни тахминан соат 16:30 ларда Учтепа тумани ҳокимлиги биноси олдида ўтказилаётган Ёшлар фестивали вақтида содир бўлган.
Маълум қилинишича, жамоат тартибини таъминлашга жалб этилган Учтепа тумани Ички ишлар бўлими патруль-пост хизмати ходими, оддий аскар Н. Пўлатбеков ҳамда ИИВ Академиясининг 2-босқич курсанти Д. Хайруллаев ҳокимлик биноси ортидан ўтувчи Бўзсув каналидан сув шовқинини эшитиб, воқеа жойига шошилган.
Улар сувга тушиб кетаётган йигитни кўриб, зудлик билан қутқарув чораларини кўрган. Фуқаро сувдан олиб чиқилиб, унга биринчи тиббий ёрдам кўрсатилган. Кейинчалик воқеа жойига етиб келган тез тиббий ёрдам бригадаси жабрланувчини шифохонага олиб кетган.
Дастлабки текширувларга кўра, фуқаро интернет орқали ташкил этилган азартли ўйинларда катта миқдорда пул маблағини йўқотганидан сўнг ўз жонига қасд қилишга уринган.
Ички ишлар органлари фуқароларни интернетдаги қимор ва азартли ўйинлардан эҳтиёт бўлишга чақириб, бундай платформалар енгил даромад ваъда қилса-да, амалда оғир молиявий йўқотишлар, психологик қарамлик ва айрим ҳолларда фожиали оқибатларга олиб келишини таъкидлади.
