3 ноябрь куни Шевченко кўчасининг Нукус кўчасидан Туркистон кўчасигача бўлган қисмини қайта ташкил этиш лойиҳаси юзасидан жамоатчилик эшитуви ўтказилди. Унда Миробод тумани ҳокими Анвар Сайфутдинов, туман ИИБ бошлиғи Улуғбек Насриддинов, маҳаллий аҳоли, блогерлар ва ОАВ вакиллари иштирок этди.
Тақдимотга кўра, умумий майдони 30 975 квадрат метр бўлган ҳудудда замонавий пиёдалар йўлаклари, дам олиш масканлари, савдо ва хизмат кўрсатиш нуқталари ташкил этилади.
Лойиҳада 2 770 квадрат метр майдонни кўкаламзорлаштириш, 154 туп манзарали бута экиш, шунингдек, қўшимча 74 туп декоратив бута учун жой ажратиш режалаштирилган. Мавжуд дарахтларни сақлаб қолиш ва яшил ҳудудларни кенгайтиришга ҳам алоҳида эътибор қаратилади.
Шунингдек, ҳудудда иккита замонавий фаввора, 10 та савдо шохобчаси ва 48 та автомобиль учун автотураргоҳ ташкил этиш кўзда тутилган. Фавворалар замонавий сув пуркаш тизимлари, декоратив ёритиш ва энергия тежамкор технологиялар билан жиҳозланиши режалаштирилган.
Лойиҳанинг яна бир эътиборли жиҳати — тарихий қиёфани сақлаб қолиш. Хусусан, аҳоли орасида «Танга ҳайкали» номи билан машҳур бўлган собиқ «Тошкент герби» монументи реконструкция қилинади. Бунда унинг мавжуд меъморий кўриниши сақланиб, атрофи ободонлаштирилади.
Бундан ташқари, ҳудудда баландлиги 65 метр бўлган Ўзбекистон Республикаси Давлат байроғи устунини ўрнатиш режалаштирилган.
Ташаббус тадбиркорлар томонидан давлат-хусусий шериклик асосида амалга оширилиши кутилмоқда. Унинг асосий мақсади ҳудуднинг тарихий қиёфасини сақлаган ҳолда шаҳар аҳолиси ва сайёҳлар учун қулай дам олиш масканини яратиш, савдо ва хизмат кўрсатиш соҳасини ривожлантириш ҳамда янги иш ўринларини ташкил этишдан иборат.
Жамоатчилик эшитувида аҳоли вакиллари ўз саволлари, таклиф ва мулоҳазаларини билдирган. Билдирилган фикрлар лойиҳани такомиллаштириш жараёнида ўрганиб чиқилиши таъкидланган.
Ҳозирча бу лойиҳа жамоатчилик муҳокамасига тақдим этилган ташаббус бўлиб, унинг амалга оширилиш муддатлари ҳақида маълумот берилмаган.
