Форумда Озарбайжон, Қозоғистон, Қирғизистон ва Туркия давлатларининг суд-ҳуқуқ таълими муассасалари, бош прокуратуралар ҳузуридаги академиялар, халқаро ташкилотлар ва экспертлар иштирок этмоқда.
Тадбирда Ўзбекистон Республикаси Судьялар олий кенгаши раиси Холмўмин Ёдгоров судьялик касби ниҳоятда масъулиятли ва шарафли эканини таъкидлаб, бўлажак судьяларни тайёрлаш ҳамда амалдаги судьяларнинг малакасини ошириш ўта мураккаб вазифа ҳисобланишини қайд этди.
Унинг сўзларига кўра, одил судлов самарадорлиги, аввало, судьяликка номзодларнинг қай даражада пухта билим ва салоҳият билан тайёрланишига боғлиқ. Шу билан бирга, ҳар бир давлатнинг бу борада ўзига хос тажриба ва ёндашувлари мавжудлиги айтилди.
Форум доирасида суд ва ҳуқуқни муҳофаза қилиш соҳаси учун кадрлар тайёрлашда сунъий интеллектдан замонавий педагогик восита сифатида фойдаланиш, судьялар малакасини ошириш жараёнига рақамли технологияларни жорий этиш ҳамда ушбу соҳадаги ҳуқуқий асосларни такомиллаштириш каби мавзулар муҳокама қилинмоқда.
Тадбир иштирокчилари ўртасида ўзаро тажриба ва фикр алмашиш ҳам кўзда тутилган.
