Ўзбекистон Республикаси Президентининг 2026 йил 9 октябрдаги ПФ–217-сон «Ўзбекистон Республикаси Вазирлар Маҳкамасининг ижро этувчи тузилмасини янада такомиллаштириш чора-тадбирлари тўғрисида»ги фармонида ҳукумат тузилмасини ўзгартириш ва таълим, илм-фан ҳамда соғлиқни сақлаш соҳаларидаги бошқарув самарадорлигини ошириш чоралари белгиланди.
Ҳужжатга кўра, Вазирлар Маҳкамаси ижро этувчи тузилмасида Бош вазирнинг биринчи ўринбосари — таълим ва илм-фан вазири лавозими жорий этилди.
Шунингдек, 12 та штат бирлигидан иборат Таълим, илм-фан ва соғлиқни сақлаш масалалари котибияти ташкил қилинади.
Котибиятнинг бешта штат бирлиги Вазирлар Маҳкамасининг Ижтимоий ривожланиш масалалари бўлими ҳисобидан, қолган еттита штат бирлиги эса қайта ташкил этилган Мактабгача ва мактаб таълими вазирлиги ҳамда Олий таълим, фан ва инновациялар вазирлигининг штат бирликларини мақбуллаштириш ҳисобига шакллантирилади.
Фармонга мувофиқ, Бош вазирнинг биринчи ўринбосари — таълим ва илм-фан вазирига Таълим ва илм-фан вазирлиги, Соғлиқни сақлаш вазирлиги ҳамда улар тизимидаги тегишли агентликлар, қўмиталар ва инспекциялар бириктирилади.
Шунингдек, унинг вазифалари доирасига Фанлар академияси, Ички ишлар вазирлиги ва Ёшлар ишлари агентлиги фаолиятининг муайян йўналишлари ҳам киради.
Хусусан, Ички ишлар вазирлигига таълим муассасаларида, ўқувчи ва талабалар орасида гиёҳвандлик воситалари ва психотроп моддалар тарқалиши, тазйиқ ҳамда зўравонлик жиноятларининг олдини олиш масалалари бўйича вазифалар бириктирилган.
Ёшлар ишлари агентлиги эса ўқувчи ва талабаларнинг замонавий билимлар ва касб-ҳунар эгаллаш имкониятларини кенгайтириш, уларни Ватанга садоқат, миллий ва умуминсоний қадриятларга ҳурмат руҳида тарбиялаш йўналишида иштирок этади.
Янги лавозим эгаси ўз ваколатлари доирасида республика ижро этувчи ҳокимият органлари раҳбарлари, Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимларининг таълим, илм-фан ва соғлиқни сақлаш соҳаларига оид вазифалари бажарилишига умумий раҳбарлик қилади ҳамда улар фаолиятини мувофиқлаштиради.
Фармонда Давлат хавфсизлик хизмати ва Миллий гвардия билан ҳамкорлик йўналишлари ҳам белгиланган. Улар ўқувчи ва талабаларни зарарли оқимлар таъсиридан ҳимоя қилиш, ватанпарварлик ва соғлом турмуш тарзини тарғиб этиш каби масалаларни қамраб олади.
Фармонга мувофиқ, Вазирлар Маҳкамаси икки ҳафта муддатда Бош вазирнинг биринчи ўринбосари — таълим ва илм-фан вазирининг функционал вазифалари ҳамда котибият тўғрисидаги низомни тасдиқлашни назарда тутувчи қарор қабул қилиши керак.
Шунингдек, Вазирлар Маҳкамасининг Ижтимоий ривожланиш масалалари бўлими Маданият ва спорт масалалари бўлими деб қайта номланади.
Ҳужжатда Вазирлар Маҳкамаси ижро этувчи тузилмасида бошқарув ходимлари сони 243 нафар этиб белгиланган.
Адлия вазирлигига манфаатдор вазирлик ва идоралар билан биргаликда бир ой муддатда фармондан келиб чиқадиган қонунчилик ҳужжатларига ўзгартириш ва қўшимчалар киритиш бўйича таклифлар тайёрлаш топширилган.
Фармон ижросини назорат қилиш Бош вазир Абдулла Арипов ва Президент Администрацияси раҳбари Саида Мирзиёева зиммасига юкланган.
