Сўнгги вақтларда фуқароларнинг муқаддас қадамжоларни зиёрат қилиш, хусусан, “Умра” ибодатини адо этиш истагидан ғаразли мақсадларда фойдаланиш, уларга турли ваъдалар бериш орқали пул маблағларини қўлга киритиш ҳолатлари учраб турибди. Айрим шахслар эса белгиланган тартибда бундай фаолиятни амалга ошириш ҳуқуқига эга бўлмаган ҳолда, ўзларини ишончли хизмат кўрсатувчи сифатида намоён этиб, фуқароларнинг ишончини суиистеъмол қилмоқда.

Давлат хавфсизлик хизмати ва ҳуқуқни муҳофаза қилувчи органлар ҳамкорлигида ўтказилаётган тезкор тадбирлар давомида бундай қонунбузилиш ҳолатларига ўз вақтида чек қўйилмоқда.

Андижон вилоятининг Асака туманида “Умра” зиёратини ташкил этиш ҳуқуқига эга бўлмаган турфирма раҳбари уч нафар фуқаронинг ишончига кириб, уларни Саудия Арабистонига муқаддас зиёратга юборишни ваъда қилади. Бунинг эвазига у фуқаролардан 3350 АҚШ доллари талаб қилади.Давлат хавфсизлик хизмати Андижон вилояти бўйича бошқармаси ҳамда ички ишлар органлари ҳамкорлигида ўтказилган тезкор тадбир давомида мазкур шахс талаб қилинган пул маблағини олган вақтида ашёвий далиллар билан ушланди.

Ҳозирда унга нисбатан Жиноят кодексининг 168-моддаси 1-қисми билан жиноят иши қўзғатилган.

Тошкент вилоятининг Бекобод туманидаги ҳусусий ўқув маркази раҳбари, 1992 й.т. шахс, 4 нафар фуқарони ноқонуний равишда “Умра” зиёратига юбориш эвазига, Бекобод шаҳрида яшовчи 1994 й.т. фуқародан 4 800 АҚШ доллари талаб қилади. Мазкур ҳолат юзасидан ўтказилган ҳамкорликдаги тезкор тадбир давомида ҳусусий ўқув маркази раҳбарининг 1995 й.т укаси фуқародан олдиндан 2000 АҚШ долларини аванс тариқасида олаётган вақтида ашёвий далиллар билан ушланди.

Айни пайтда ушбу шахсларга нисбатан ЖКнинг 168-моддаси 2-қисми “б” банди билан жиноят иши қўзғатилди.