Тадбирда Хоразм вилояти ҳокимлиги ҳамда Маънавият ва маърифат маркази вакиллари, университет профессор-ўқитувчилари ва талабалар иштирок этди.
Тақдимотни университет ректори Феруза Мадрахимова кириш сўзи билан очиб, асарнинг ўзбек ва турк халқлари ўртасидаги азалий дўстликни мустаҳкамлаш, илмий ва маданий ҳамкорликни ривожлантиришдаги аҳамиятини таъкидлади.
Қайд этилишича, китобда Ўзбекистоннинг қадимий ва шонли тарихи, миллий-диний қадриятлари, халқимизнинг фазилатлари, Янги Ўзбекистонда амалга оширилаётган кенг кўламли ислоҳотлар, шунингдек, мамлакатимизнинг ички ва ташқи сиёсатига оид муаллиф мулоҳазалари баён этилган.
Тадбирда Хоразм вилояти ҳокими ўринбосари Нигора Қутлимуротова ва Республика Маънавият ва маърифат маркази Хоразм вилояти бўлими раҳбари Бекзод Абдиримов асарнинг маънавий-маърифий аҳамияти ҳамда икки халқ ўртасидаги маданий алоқалар ҳақида фикр билдирди.
Таъкидланганидек, китобда Ўзбекистондаги янгиланиш жараёнларига хорижлик зиёли нуқтаи назаридан баҳо берилган бўлиб, у муаллифнинг мамлакатимизга бўлган самимий муносабати ва юксак эътирофини ифода этади.
Асар муаллифи, Сакарья университети профессори, фан доктори Кемал Явуз Атаман китобнинг яратилиш тарихи, Ўзбекистондан олган таассуротлари ва халқимизга бўлган самимий муносабати билан ўртоқлашди.
Шунингдек, университет Филология факультети олимлари Исҳоқжон Исмоилов, Абдулла Ўразбоев ва Дониёр Юлдашев сўзга чиқиб, асарнинг илмий, адабий ва маънавий қиммати, ўзбек-турк адабий алоқаларини ривожлантиришдаги ўрни ҳақида фикр билдирди.
Мазкур асар Ўзбекистон мустақиллигининг 35 йиллиги муносабати билан нашр этилган бўлиб, қардош турк зиёлисининг юртимизга бўлган самимий муҳаббати ва юксак эҳтиромининг ўзига хос ифодасидир.
Ҳамкорлик материали
