Тадбир Туризм қўмитаси ва Хоразм вилояти ҳокимлиги ҳамкорлигида ташкил этилди ҳамда “Ичан қалъа” тарихий мажмуаси ва “Arda Xiva” замонавий сайёҳлик маркази каби ноёб жойларда ўтказилди. Бу йил фестивалга 186 минг нафар меҳмон ташриф буюрди, жумладан 150 минг маҳаллий ва 36 минг хорижий сайёҳлар.
Фестивалнинг энг ёрқин воқеаларидан бири эса “Энг катта қовун дегустацияси” бўйича жаҳон рекордининг ўрнатилгани бўлди.
Guinness World Records томонидан берилган расмий сертификатга кўра, рекорд 2026 йил 9 август куни Хива шаҳрида қайд этилди. Унда 259 киши бир вақтда 10 дан ортиқ қовун навини татиб кўрди. Рекордни тасдиқлаш жараёнида Guinness World Records расмий ҳаками, Туркия ва Марказий Осиё бўйича вакили Шейда Субаши Гемижи иштирок этди.
Қайд этиш керакки, фестивалнинг барча кунлари таниқли санъаткорларнинг ёрқин чиқишлари ҳамда маҳорат дарслари, кўргазмалар ва танловларни ўз ичига олган бой кўнгилочар дастур билан ўтказилди. Тантанали ёпилиш маросими давомида эса рус хонандаси МакСим ўз чиқиши билан меҳмонларга завқ бағишлади.
Фестивалда Хоразм вилояти туманлари, етакчи фермер хўжаликлари ва бошқа иштирокчилар ўз стендларида ўнлаб қовун навларини, шунингдек, вилоят маҳсулотлари, технологиялари ва ютуқларини намойиш этдилар. Меҳмонлар турли хил қовунлардан татиб кўриш, ишлаб чиқарувчилар билан суҳбатлашиш ва Хоразмнинг қишлоқ хўжалиги анъаналари билан яқиндан танишиш имкониятига эга бўлдилар.
Фестивалнинг якуний қисмида ғолиблар эълон қилинди: учинчи ўринга Урганч давлат университети, “UzAuto” Хоразм филиали, Автомобил йўллари қўмитаси Хоразм вилояти бошқармаси муносиб кўрилди, иккинчи ўринни Хоразм вилояти Қишлоқ хўжалиги бошқармаси банд қилди, биринчи ўринни Янгиариқ тумани ҳокимлиги эгаллади, бош соврин эса Хива шаҳар ҳокимлигига насиб этди.
“Қовун сайли” фестивали Хоразм вилоятининг юқори сайёҳлик салоҳиятини яна бир бор тасдиқлади ва агротуризмни ривожлантириш ҳамда минтақанинг замонавий ва меҳмондўст сайёҳлик маскани сифатидаги обрўйини мустаҳкамлаш йўлидаги муҳим қадам бўлди.
