Музейнинг янгиланиши маданий туризмни ривожлантиришга хизмат қилиб, пойтахтнинг туристик салоҳиятини янада кенгайтирмоқда.
Замонавий интерактив ва мультимедиа технологиялари асосида яратилган музей экспозицияси ташриф буюрувчиларни Ўзбекистон тарихининг энг қадимги цивилизациялардан то бугунги кунгача бўлган босқичлари билан таништиради. Экспозицияда ноёб археологик топилмалар, Буюк ипак йўлига оид материаллар, буюк тарихий шахслар ҳамда мамлакат тараққиётининг муҳим босқичларини акс эттирувчи экспонатлар намойиш этилган.
Хусусан, экспозициянинг алоҳида қисми Ўзбекистоннинг мустақиллик йилларида эришган ютуқлари, мамлакат тараққиётининг замонавий босқичи ҳамда 2016–2026 йилларда амалга оширилган кенг кўламли ислоҳотлар натижаларига бағишланган. Мазкур бўлим ташриф буюрувчиларга Янги Ўзбекистон тараққиёт стратегияси доирасида давлат ва жамият ҳаётининг турли соҳаларида амалга оширилаётган туб ўзгаришлар билан яқиндан танишиш имконини беради. Шунингдек, экспозицияда эришилган натижалар Учинчи Ренессанс пойдеворини шакллантириш йўлидаги муҳим босқич сифатида ёритилган.
Янгиланган музей Тошкент бўйлаб маданий туризм йўналишларининг муҳим таркибий қисмига айланиб, хорижий ва маҳаллий сайёҳларга Ўзбекистоннинг кўп асрлик тарихи, бой маданияти ва миллий анъаналари билан янада чуқурроқ танишиш имкониятини тақдим этади.
