Бу ҳақда Самарқанд вилояти молия бош бошқармаси бошлиғи Б.Мирзаев халқ депутатлари вилоят Кенгаши сессиясидаги ҳисоботи чоғида маълум қилди.

Бошқарма томонидан кадастр, электр тармоқлари корхоналари, газ идоралари ва ФҲДЁ бўлимлардан тегишли маълумотлар олиниб, тадбиркорлик субъектларининг ҳудудий солиқ идораларига тақдим этган маълумотлари билан солиштирилганда, 21,4 млрд. сўм қўшимча даромад манбалари мавжудлиги аниқланди.

Жисмоний шахсларга тегишли бўлган турар жой объектлари қайта баҳоланганлиги ва солиқ идоралари томонидан солиқ манбаси сифатида қамраб олинганлиги таҳлил қилинганда, вилоят бўйича 751 минг 228 та турар жой объектидан 55 минг 639 тасида турар жой мулклари мавжуд эмаслиги кўрсатилган. Бироқ, маҳалла фуқаролар йиғинлари жалб этилиб, ушбу ҳолатнинг ҳаққонийлиги ўрганилганда, 12 минг 272 та турар жойда мулклар мавжудлиги, шунингдек, молия бўлимлари томонидан жойига чиқиб танланма асосида ўрганилганда, 906 тасида мулк объектлари борлиги аниқланди.

Бундан ташқари, 3275 ҳолатда юридик корхоналар томонидан давлат солиқ инспекцияларига тақдим этилган ҳисоботлар таҳлил қилинганда, 480 ҳолатда кадастр маълумоти билан солиқ тўловчилар ўртасида 481,1 гектар ер майдони кам кўрсатилганлиги кузатилди. Бунинг оқибатида ушбу ер майдонлари солиқ базасига киритилмаган ва 7,7 млрд. сўм солиқ ҳисобланмаган.