Бу бўйича Тошкент шаҳар Кенгашининг 2026 йил 17 сентябрдаги қарори билан «Ўзбекистон темир йўллари» АЖнинг мазкур лойиҳа концепцияси маъқулланган.

Лойиҳанинг умумий қиймати 157,059 млн еврони ташкил этади. Шундан 123,5 млн евро Европа инвестиция банки кредити ҳисобидан молиялаштирилади. Кредитни сўндириш муддати 24 йил этиб белгиланган.

Асосий инвестиция харажатларининг ўзи 141,5643 млн еврони ташкил этиб, унинг 123,5 млн евроси 10 та электропоездни харид қилишга йўналтирилади.

Янги поездлар қаерларда ҳаракатланади?

Лойиҳа доирасида тўрт вагонли 10 та ŠKODA 25Ev электропоезди харид қилиниши кўзда тутилган. Улар Ўзбекистондаги энг талаб юқори бўлган шаҳар атрофи йўналишларида ишлатилади.

Режалаштирилган тақсимот қуйидагича:

  • Тошкент — Чирчиқ — Хўжакент — Чиноркент — 1 та;
  • Тошкент — Янгийўл — Чиноз — Сирдарё — Гулистон — Янгиер — Ховос — Бекобод — 1 та;
  • Тошкент — Нурафшон — Оҳангарон — Ангрен — 2 та;
  • Тошкент — Келес — 1 та;
  • Қўқон — Поп — Наманган — Андижон — Марғилон — Қўқон ҳалқа йўналиши — 3 та;
  • Самарқанд — Бухоро — 1 та;
  • Самарқанд — Қарши — Шаҳрисабз — 1 та.

Йўловчилар учун қандай ўзгариш бўлади?

Ҳужжатда қайд этилишича, янги поездлар эскирган ER9E таркибларига нисбатан кўпроқ йўловчи қабул қилади. Янги поездда 432 та ўтириш ўрни бўлади.

Шунингдек, поездларда иқлим назорати, USB қувватлаш розеткалари, LED ахборот дисплейлари, видеокузатув ва автоматик ёнғин сигнализацияси бўлади. Ҳаракати чекланган йўловчилар учун ҳам махсус жойлар ва пандуслар кўзда тутилган.

Техник ҳисоб-китобларга кўра, янги электропоездлар айрим йўналишларда сафар вақтини 10–15 фоизгача қисқартириши мумкин.

Масалан, ҳужжатда Тошкент — Келес йўналишида янги поезд билан сафар вақти 25–30 дақиқа, Тошкент — Чирчиқ — Чиноркент йўналишида 55–60 дақиқа, Тошкент — Бекобод йўналишида эса 2 соат 30 дақиқа — 2 соат 45 дақиқа бўлиши кўрсатилган.

Шаҳар атрофи поездлари сони ҳам оширилади

Ҳужжатда келтирилишича, 2025 йилда шаҳар атрофи темир йўл транспортида 10,5 млн йўловчи ташилган. 2030 йилгача бу кўрсаткични 23,5 млн йўловчига етказиш мақсад қилинган.

Шунингдек, электропоездлар ҳаракати йўналишларини 40 тадан 53 тага ошириш режалаштирилган.

Янги поездлар ҳисобига ташиш қувватини камида 20 фоизга ошириш, айрим энг юкланган йўналишларда қатновлар частотасини кунига 2–3 жуфтдан 4–5 жуфтгача кўпайтириш имконияти яратилиши кутилмоқда.

Лойиҳа доирасида машинистлар, уларнинг ёрдамчилари ҳамда янги поездларга техник хизмат кўрсатувчи муҳандис-техник ходимлар учун янги иш ўринлари яратилиши ҳам кўзда тутилган.