Бу ҳақда «Дунё» АА хабар берди.
Минск шаҳрида бўлиб ўтган мулоқотда Ўзбекистоннинг МДҲ доирасидаги кўп томонлама ҳамкорликдаги иштироки ва уни янада ривожлантириш масалалари муҳокама қилинди.
Сергей Лебедев сўнгги ўн йилликда Ўзбекистоннинг Ҳамдўстлик фаолиятидаги иштироки сезиларли даражада кенгайганини таъкидлади. Унинг сўзларига кўра, мамлакат МДҲ доирасида қабул қилинаётган ҳужжатларга фаол қўшилиш билан бирга, янги ташаббуслар муаллифи сифатида ҳам иштирок этмоқда.
МДҲ бош котиби Ўзбекистон Президенти томонидан илгари сурилган иқтисодий зоналарни қўллаб-қувватлаш бўйича «йўл харитаси»ни ишлаб чиқиш, стартаплар ва инновацияларни илгари суриш каби ташаббуслар халқаро ҳамжамиятда катта қизиқиш уйғотаётганини қайд этди.
Шунингдек, МДҲ венчур платформасини яратиш ва энергетика секторини инновацион ривожлантириш дастурини тайёрлаш лойиҳалари ҳам муҳим ташаббуслар сифатида эътироф этилди.
Қайд этилишича, 2024 йилда Тошкент МДҲнинг биринчи Ёшлар пойтахти бўлди. 2025 йилда эса Ўзбекистон пойтахтида МДҲга аъзо давлатларнинг биринчи Минтақалар форуми ўтказилди. Жорий йилда «ИННОПРОМ. Марказий Осиё» халқаро саноат кўргазмаси ва «МДҲ Инновацион саноати» форуми каби йирик тадбирлар ҳам муваффақиятли ташкил этилди.
Учрашувда 2027 йилда Ўзбекистон МДҲга раислик қилиши ҳам қайд этилди. Мамлакат Ҳамдўстликка иккинчи бор раислик қилади. Ўзбекистон 2020 йилда, пандемиянинг мураккаб шароитларига қарамай, ушбу масъулиятли вазифани муносиб уддалаган эди.
