Меморандумни
иккала ташкилот раҳбарлари Акмал Саидов ва Ли Хункуй имзоладилар.
Ушбу тадбир Тошкент шаҳрида бўлиб ўтган «Хитой –
Марказий Осиё» инсон ҳуқуқларини ривожлантириш бўйича 2026 йил форуми доирасида ташкил этилди. Форум Хитойнинг Инсон ҳуқуқларини ривожлантириш жамғармаси
(CFHRD) ва Инсон ҳуқуқлари бўйича Ўзбекистон Республикаси Миллий
маркази томонидан ўтказилди.
Ўзаро англашув
меморандуми муқаддимасида Томонларнинг ўзаро дўстона муносабатларни
мустаҳкамлаш, шунингдек, инсон ҳуқуқлари соҳасида тажриба алмашинув ва
ҳамкорликни кенгайтириш ҳамда Ўзбекистон – Хитой ўртасида инсон ҳуқуқларини
ривожлантиришга биргаликда кўмаклашиш истаги акс этган.
Меморандумда қайд
этилганидек, Томонлар инсон ҳуқуқларини рағбатлантириш ва ҳимоя қилиш соҳасида
тенглик, ўзаро ҳурмат ва манфаатдорлик тамойиллари асосида ҳамкорликни амалга
оширадилар. Меморандум доирасида, жумладан:
·
инсон ҳуқуқлари масалалари бўйича қўшма тадқиқотлар
олиб бориш, шунингдек, инсон ҳуқуқлари бўйича билимларни тарғиб қилиш ва ўқув
дастурларини амалга ошириш;
·
инсон ҳуқуқлари соҳасида ўзаро манфаатли ахборот
алмашинувини йўлга қўйиш ва илмий семинарларни биргаликда ўтказиш;
·
ҳар икки давлатнинг инсон ҳуқуқлари соҳасидаги
халқаро мажбуриятларини бажаришга кўмаклашиш ва инсон ҳуқуқлари бўйича глобал
бошқарувни такомиллаштиришга кўмак бериш каби йўналишларда ҳамкорлик қиладилар.
Меморандумда
бундай ҳамкорликни амалга ошириш шакллари ҳам кўрсатилган. Бу ўринда, хусусан,
инсон ҳуқуқларини рағбатлантириш ва ҳимоя қилиш соҳасида ўзаро ахборот,
қонунчилик ҳужжатлари, ахборий-таҳлилий материаллар ва адабиётлар, шунингдек, инсон
ҳуқуқлари соҳасидаги халқаро мажбуриятларни бажаришга оид тажриба алмашинуви
ҳамда инсон ҳуқуқларини ҳимоя қилишга кўмаклашишга қаратилган қўшма илмий
дастурлар ва ижтимоий аҳамиятга молик лойиҳаларни амалга ошириш ҳақида сўз
бормоқда.
Бундан ташқари, ходимлар
учун ташрифлар ва амалиётлар ташкил этиш, инсон ҳуқуқлари масалалари бўйича
халқаро конференциялар, семинарлар, давра суҳбатлари ва ўқув дастурлари ўтказиш
кўзда тутилмоқда. Қолаверса, инсон ҳуқуқларини рағбатлантириш ва ҳимоя қилиш
масалалари бўйича қўшма нашрлар тайёрлаш ва чоп этиш, инсон ҳуқуқлари
соҳасидаги халқаро ҳамкорлик учун алоқаларни мустаҳкамлашга алоҳида эътибор
қаратилади.
Инсон
ҳуқуқлари бўйича Ўзбекистон
Республикаси
Миллий маркази матбуот хизмати.
