Бу ҳақда Қишлоқ хўжалиги вазирлиги маълум қилди.
Қайд этилишича, йиғиб олинган ҳосилнинг 3 миллион 515 минг 597 тоннаси қарийб 3 мингта замонавий пахта териш машинаси ёрдамида териб олинди. Мамлакат бўйича пахта теримини механизациялаштириш даражаси ўртача 76 фоизни ташкил этди.
Вилоятлар кесимида бу кўрсаткич Жиззах вилоятида 98,5 фоиз, Сирдарё вилоятида 94,2 фоиз ва Тошкент вилоятида 81,2 фоизга етди. Умуман, ҳудудларда пахта теримини механизациялаштириш даражаси 61 фоиздан 98,5 фоизгача бўлди.
Айни кунларда пахта далаларида терим ишлари қизғин давом этмоқда. Жумладан, 49 минг гектардан зиёд майдонда биринчи терим ишлари амалга оширилиб, ҳосилни нобуд қилмасдан йиғиб олишга алоҳида эътибор қаратилмоқда.
Мавсумдаги натижаларга эришишда қишлоқ хўжалигига замонавий агротехнологияларни жорий этиш, илғор техникалардан фойдаланиш ҳамда илм-фан ютуқларини амалиётга татбиқ этиш муҳим ўрин тутди. Йил давомида мамлакатнинг барча ҳудудларида пахтачилик бўйича амалий семинарлар ўтказилди, соҳа олимлари илмий изланишлар олиб бориб, ишлаб чиқаришга илмий тавсиялар ва илғор тажрибаларни жорий этишга ҳисса қўшди.
Қайд этилишича, қишлоқ хўжалигини ривожлантириш, меҳнат унумдорлигини ошириш ва мавжуд ресурслардан самарали фойдаланишга қаратилган чора-тадбирлар пахтачиликда янги имкониятларни очмоқда.
4,63 миллион тонна пахта ҳосили — деҳқонлар, фермерлар, кластерлар ва механизаторларнинг машаққатли меҳнати, шунингдек, замонавий технологиялар ҳамда илмий ёндашувларнинг амалий натижасидир. Терим мавсуми давом этар экан, асосий эътибор ҳосилни сифатли ва нес-нобуд қилмасдан йиғиб олишга қаратилмоқда.
