Ҳар куни бу ишларга ўртача 4,5 мингта махсус техника ва 10 мингдан ортиқ ходим жалб этилмоқда. Натижада бир кунда 30–40 минг тонна чиқинди олиб чиқилмоқда.
40 кун давомида эса жами 1 миллион 400 минг тонна қаттиқ маиший чиқинди ҳамда 2 минг тонна қурилиш чиқиндиси олиб чиқилиб, утилизация қилинди.
Ҳозирга қадар республикадаги 8 150 та маҳалланинг 7 674 таси тозалик акциялари билан тўлиқ қамраб олинди.
Ишларни мувофиқлаштириш учун Чиқиндиларни бошқариш ва сиркуляр иқтисодиётни ривожлантириш агентлиги, унинг ҳудудий бошқармалари ва тизим ташкилотларида махсус штаблар ташкил этилган. Масъул ходимлар ҳудудларга бириктирилиб, кеча-ю кундуз навбатчилик ва доимий мониторинг йўлга қўйилган.
Техникаларнинг узлуксиз ишлашини таъминлашга ҳам алоҳида эътибор қаратилмоқда. Аниқланган 64 та носозликнинг 52 таси тезкор бартараф этилди, 12 та техника алмаштирилди. Фавқулодда ҳолатлар учун яна 155 та техника захирада сақланмоқда.
Тозалик тадбирлари давомида қонунбузарликларга қарши назорат ҳам кучайтирилди. Чиқиндилар билан боғлиқ 97 та ҳуқуқбузарлик аниқланиб, қоидабузарларга жами 165,4 миллион сўм маъмурий жарима қўлланилди.
Айни пайтда бозорлар, савдо мажмуалари, боғлар ва дам олиш масканларида тозаликни таъминлаш ишлари кучайтирилган. Мактаб ва мактабгача таълим муассасаларида таъмирлашдан ҳосил бўлган чиқиндилар ҳам тезкор олиб чиқилмоқда.
Шу билан бирга, аҳолидан келиб тушган 327 та мурожаат кўриб чиқилди. Уларнинг 275 таси жойида ҳал этилган, 52 таси бўйича ўрганиш ишлари давом этмоқда.
Қисқаси, байрам кунлари дам олишга чиққанлар кўп бўлиши мумкин. Аммо юрт тозалиги учун масъул минглаб инсонлар хизматда. «Долзарб 40 кунлик» доирасидаги ишлар эса тасдиқланган режа асосида изчил давом этмоқда.
