Бу ҳақда Ўзбекистон Республикаси Президенти Администрацияси раҳбари Саида Мирзиёева БМТнинг Аҳолишунослик жамғармаси (UNFPA) билан ҳамкорликда демографик барқарорлик масалаларига бағишланган тадбирдан сўнг маълум қилди.
Унинг таъкидлашича, Ўзбекистоннинг энг асосий капитали — ёш авлод.
Мазкур салоҳиятни келгусида демографик дивиденд манбаига айлантириш учун аҳолининг, айниқса, аёллар ва болаларнинг саломатлиги, таълими ҳамда хавфсизлигига бугундан инвестиция киритиш зарур.
Шу мақсадда мамлакатда демографик прогнозлаш тизими йўлга қўйилмоқда. Шунингдек, «Демографик дивиденд – 2050» стратегиясини ишлаб чиқиш режалаштирилмоқда.
«Мамлакатимиз келажаги нафақат аҳоли сони, балки энг аввало улар қандай имкониятларга эга бўлиши билан белгиланади», — деди Саида Мирзиёева.
Янги стратегия аҳолининг демографик ўзгаришларини узоқ муддатли прогноз қилиш ва мавжуд салоҳиятдан самарали фойдаланиш бўйича ёндашувларни белгилаши кутилмоқда.
