Бу «Волонтёрлик фаолиятини янада оммалаштириш бўйича қўшимча чора-тадбирлар тўғрисида»ги Президент фармонида (ПФ–240-сон, 2026 йил 6 ноябрь) белгиланган.
Фармонга кўра, волонтёрлик ҳаракатини ривожлантириш орқали аҳоли, айниқса, ёшларда ижтимоий масъулият, ҳамжиҳатлик, ўзаро ёрдам ва раҳм-шафқат туйғуларини шакллантириш асосий мақсадлардан бири этиб белгиланди.
Шунингдек, ижтимоий ҳимояга муҳтож шахслар, ёлғиз кексалар ва ногиронлиги бўлган инсонларга беғараз ёрдам кўрсатиш, атроф-муҳитни муҳофаза қилишга қаратилган хайрия тадбирларини ташкил этиш назарда тутилган.
Волонтёрлар қандай рағбатлантирилади?
«Эзгулик сари қадам» шиори остида волонтёрлик фаолиятини умуммиллий ҳаракатга айлантириш режалаштирилган. Бунинг учун:
- волонтёрлар иштирокида ижтимоий аҳамиятга молик тадбирлар, лойиҳалар ва акциялар ташкил этилади;
- уларнинг ҳуқуқ ва эркинликларига риоя этилиши таъминланади;
- волонтёрлар моддий ва маънавий рағбатлантирилади;
- «Фидойи волонтёр» кўкрак нишони таъсис этилади;
- 5 декабрь — Халқаро кўнгиллилар куни кенг нишонланади;
- халқаро ташкилотлар ва хорижий давлатлар вакиллари иштирокида Осиё волонтёрлари форуми ўтказиб борилади.
Талабалар учун «Касбий волонтёрлик» дастури йўлга қўйилади
2027 йилдан бошлаб волонтёрлик қилиш истагидаги ёшлар учун «Service Learning» — ижтимоий хизмат асосидаги таълим дастури бўйича қисқа муддатли ўқувлар ташкил этилади. Уларнинг мақсади ёшларда волонтёрлик кўникмаларини шакллантиришдан иборат.
Шунингдек, давлат олий таълим ташкилотлари талабалари ва техникум ўқувчилари учун «Касбий волонтёрлик» дастури амалга оширилади.
Бунда давлат органлари ва ташкилотлари талабалар ҳамда техникум ўқувчиларига дарсдан ташқари вақтларда волонтёрлар гуруҳи таркибида фаолият юритишлари учун зарур шароитлар яратиб беради. Талабалар эса ўз хоҳишига кўра, таълим олаётган ихтисослигига мос волонтёрлик дастурларида иштирок этади.
Яна бир муҳим янгилик: 2027 йил 1 январдан бошлаб тажриба-синов тариқасида «Инсон» ижтимоий хизматлар марказларига ижтимоий ходимларни ишга қабул қилишда номзодларнинг малака талаблари бўйича кўрсаткичлари тенг бўлса, волонтёрлик фаолияти билан шуғулланганларга устунлик берилади.
