Бу ҳақда Давлат активларини бошқариш агентлиги матбуот хизмати маълум қилди.
Қайд этилишича, сўнгги йилларда давлатнинг иқтисодиётдаги иштирокини қисқартириш, хусусий капитал ва инвестициялар учун кенгроқ имконият яратиш мақсадида давлат активларини бошқариш ва хусусийлаштириш соҳасида қатор ислоҳотлар амалга оширилди.
Жумладан, 2023 йилда «Давлат мулкини бошқариш тўғрисида»ги, 2024 йилда эса «Давлат мулкини хусусийлаштириш тўғрисида»ги қонунлар қабул қилинди.
Хусусийлаштириш жараёнларига халқаро амалиётга мос механизмлар ҳам жорий этилмоқда. «Сот ёки тушунтир» тамойили асосида 2021–2025 йилларда давлат иштирокидаги корхоналар сони 61 фоизга қисқартирилди.
Йирик давлат активларига хусусий ва хорижий капитални жалб қилиш бўйича ҳам муҳим битимлар амалга оширилди. Хусусан, Coca-Cola Uzbekistan 252 млн АҚШ долларига, Ipoteka bank 324 млн АҚШ долларига, Самарқанд автомобиль заводидаги давлат улушининг 75,2 фоизи эса 80 млн АҚШ долларига сотилди.
Шу билан бирга, кўчмас мулк ва ер бозорларида ҳам янги механизмлар жорий этилмоқда. 2022–2025 йилларда мулк ҳуқуқи ва ижара ҳуқуқи асосида аукционларга чиқарилган ва реализация қилинган ер участкалари ҳажми қарийб 4 баробарга ошди.
2026 йилнинг биринчи ярмида 1,8 минг гектар ер участкаси реализация қилинди. Қишлоқ хўжалигига мўлжалланмаган ер участкаларини хусусийлаштириш бўйича мурожаатлар сони эса 2022 йилга нисбатан қарийб 5 баробарга ошган.
Давлат активларини сотишда рақамли механизмлардан фойдаланиш кўлами ҳам кенгаймоқда. Бугунги кунга қадар «E-auksion» электрон савдо платформаси орқали қарийб 1,5 млн объект савдога чиқарилган, шундан 1,2 млн дан ортиғи реализация қилинган.
Шунингдек, 2026 йилда «Риелторлик фаолияти тўғрисида»ги янги қонун қабул қилиниб, соҳада Ягона реестр ва мулк объектларини биргаликда таклиф қилиш имконини берувчи мультиллистинг тизимини жорий этиш назарда тутилди.
Ислоҳотларнинг кейинги босқичида 2030 йилга қадар нодавлат сектор улушини 85 фоизга етказиш, давлат иштирокидаги корхоналар сонини қарийб 6 баробарга қисқартириш режалаштирилган.
Давлат активларини бошқариш агентлиги маълум қилишича, бу чоралар давлат мулкидан самарали фойдаланиш, хусусийлаштириш жараёнларининг шаффофлигини ошириш, хусусий капитал ва инвестицияларни жалб қилиш ҳамда тадбиркорлик учун янги имкониятлар яратишга қаратилган.
