Мазкур фестивал машҳур “Cannes Film Festival” доирасида, у билан параллел равишда ўтказиладиган мустақил инклюзив кинофестивал ҳисобланади. Унда Африка, Америка, Европа ва Осиё давлатларидан киноижодкорлар иштирок этди.
Маълум қилинишича, 2026 йилги кино мавсуми учун 600 дан ортиқ фильм аризаси қабул қилинган бўлиб, улардан 20 дан зиёд фильм ҳакамлар ҳайъати томонидан саралаб олинган. Сараланган ишлар орасида “Қадам. Қуёш боласи Юсуф” фильми гран-при мукофотига муносиб деб топилди.
Фильм Даун синдроми билан туғилган Юсуф исмли бола ҳақида ҳикоя қилади. Асарда унинг мусиқага муҳаббати, ҳаётга ишончи ва онаси Зилоланинг фарзандининг жамиятда муносиб ўрин эгаллаши учун кураши таъсирчан тарзда акс эттирилган.
Ушбу ютуқ миллий кинематография учун муҳим воқеа бўлиб, фильм ўзининг мазмуни, бадиий ифодаси ва инсонпарварлик ғоялари билан халқаро экспертлар эътиборини қозонган.
ENTRE DEUX CANNES халқаро инклюзив кинофестивали ногиронлиги бўлган инсонлар, тенглик, инсонпарварлик ва жамиятдаги инклюзия мавзуларини ёритувчи фильмларни қўллаб-қувватлашга ихтисослашган. Фестиваль доирасида бадиий, ҳужжатли, қисқа метражли ва анимацион фильмлар намойиш этилади.
