Қиймати 2,4 миллиард долларга баҳоланган активлар бўйича ўтказилган мазкур ИПО Ўзбекистон иқтисодиёти учун тарихий воқеа сифатида баҳоланмоқда.

Таъкидланишича, бу 2021 йилдан буён Лондон фонд биржасида амалга оширилган энг йирик IPOлардан бири бўлди. Ўзбек акцияларига халқаро инвесторлар томонидан юқори қизиқиш билдирилди.

Жумладан, BlackRock ва Franklin Resources каби йирик молиявий институтлар ўзбек акцияларига сармоя киритди. Мутахассислар фикрича, бу Ўзбекистон иқтисодиётининг барқарорлиги ва ўсиш салоҳиятига бўлган ишонч белгиси ҳисобланади.

Маълум қилинишича, акцияларнинг дастлабки IPO нархи 25 доллар этиб белгиланган. Кейинги кунларда эса акциялар қиймати ўсиб борган:
— 13 май куни — 26 доллар;
— 14 май куни — 27,2 доллар;
— 15 май куни — 27,25 доллар.

Шу тариқа, акция сотиб олган инвесторлар қисқа вақт ичида қарийб 9 фоиз фойда кўрган.

Халқаро инвесторлар ва молия институтлари вакиллари ушбу битимни Ўзбекистон учун тарихий қадам сифатида баҳоламоқда. Уларнинг таъкидлашича, мамлакатда кейинги йилларда амалга оширилган иқтисодий ислоҳотлар, бозор иқтисодиётига ўтиш жараёнлари ва модернизация дастурлари халқаро капитал бозорларининг эътиборини тортган.

Шунингдек, бу Ўзбекистон тарихида глобал капитал бозоридан ярим миллиард доллардан ортиқ маблағ жалб қилинган илк акциядорлик битими экани қайд этилди.

Маълумот учун, Тошкент Республика фонд биржасида расмий савдолар 18 май куни бошланиши кутилмоқда. Шу санадан бошлаб London Stock Exchangeда ҳам шартсиз савдоларга старт берилади. Эндиликда фуқаролар иқтисодиётнинг йирик корхоналари акцияларига сармоя киритиш орқали даромад олиш имкониятига эга бўлади.