Бу ҳақда “Дунё” АА хабар берди.
9 май — Хотира ва қадрлаш куни арафасида фашизм устидан қозонилган ғалабага ҳисса қўшган инсонлар хотираси яна бир бор ёдга олинмоқда. Шу муносабат билан Ўзбекистон Президенти Шавкат Мирзиёев қарорига мувофиқ, Буюк Британия фуқаролари — марҳум Жон ва Филлис Эмили Ле Бретонлар “Дўстлик” ордени билан мукофотланди.
Ўзбекистоннинг Лондондаги элчиси Равшан Усмонов Жерси оролига ташриф буюриб, мукофотни марҳум оиланинг фарзандлари — Далси ва Алан Ле Бретонларга топширди.
Тақдирлаш маросими Далси Ле Бретон даволанаётган “Cheval Roc” қариялар уйида бўлиб ўтди. Унда муассаса раҳбарияти, маҳаллий аҳоли, Jersey Heritage вакиллари ҳамда BBC, ITV журналистлари иштирок этди.
Тадбирда сўзга чиққан муассаса раҳбари Ник Бетани британиялик оиланинг инсонпарварлигини юксак баҳолаган Ўзбекистон ҳукуматига миннатдорлик билдирди. У мукофот Жерси оролининг фашистлар истилосидан озод этилганининг 81 йиллиги арафасида топширилганини алоҳида рамзий аҳамиятга эга эканини таъкидлади.
Далси ва Алан Ле Бретонлар ота-оналари хотирасини илиқ сўзлар билан ёдга олиб, Ўзбекистон халқига самимий миннатдорлик билдирди. Улар фашизм бутун инсоният учун таҳдид бўлганини, ғалаба эса халқларнинг бирлиги ва ўзаро ёрдами туфайли қўлга киритилганини таъкидлади.
Шунингдек, улар Боқижон Акрамов ҳақидаги хотиралари билан ўртоқлашиб, оила аъзолари орасида “Том амаки” номи билан танилган ўзбек аскари меҳнаткашлиги, камтарлиги ва инсоний фазилатлари билан қисқа вақт ичида оиланинг меҳрини қозонганини қайд этди.
Маълум қилинишича, Иккинчи жаҳон уруши йилларида бошланган ушбу воқеа бугунги кунда Ўзбекистон ва Буюк Британия халқлари ўртасидаги дўстлик ва инсоний қадриятлар рамзига айланган. Бу ҳақдаги тарих BBC ва Британиянинг бошқа етакчи оммавий ахборот воситаларида ҳам кенг ёритилган.
Жерси ороли — Нормандия оролларининг энг йириги бўлиб, 1940 йил июль ойида фашистлар томонидан босиб олинган. У ерда ҳарбий инфратузилма ва ерости бункерлари барпо этилган.
Оддий ўқитувчи бўлиб ишлаган Боқижон Акрамов уруш бошлангач армияга сафарбар этилган ва Украина фронтига жўнатилган. Жанглардан бирида немис қўшинлари минглаб совет аскарларини қириб ташлаган, тирик қолганлар эса асир олинган.
1942 йил июль ойида у икки минг асир билан бирга Жерси оролига олиб келиниб, ерости туннеллари қурилишига жалб этилган. Ойлаб давом этган очлик ва оғир синовларга қарамасдан, у асирликдан қочишга муваффақ бўлган.
Ле Бретонлар оиласи эса ҳаётини хавф остига қўйиб, қочқин аскарга ўз уйидан бошпана берган ва уни қарийб уч йил давомида фашистлардан яшириб келган. 1945 йил май ойида Боқижон Акрамов Ўзбекистонга қайтиб келган.
Жон ва Филлис Эмили Ле Бретонларнинг бу жасорати инсонпарварликнинг ёрқин намунаси сифатида тарихда сақланиб қолмоқда.
