Мамлакатимизнинг Покистондаги элчихонаси ташаббуси билан “WaterCon” делегациясининг Ўзбекистонга бизнес-миссияси ташкил этилди. Сафар давомида компания вакиллари Инвестициялар, саноат ва савдо вазирлиги, Қишлоқ хўжалиги вазирлиги ҳамда Жиззах вилояти ҳокимлигида музокаралар ўтказди.
Учрашувларда қишлоқ хўжалиги маҳсулотларини етиштириш, уларни чуқур қайта ишлаш ва замонавий технологияларни жорий этиш истиқболлари муҳокама қилинди.
Музокаралар якунида “WaterCon” компанияси ва Жиззах вилояти ҳокимлиги ўртасида ўзаро англашув меморандуми имзоланди.
Ҳужжатга кўра, Янгиобод туманида 500 гектар майдонда замонавий зайтун плантацияси ташкил этилади. Лойиҳа доирасида зайтун етиштириш билан бир қаторда, уни қайта ишлаш ва тайёр маҳсулот ишлаб чиқариш йўлга қўйилади.
Кейинги босқичларда зайтунни саноат усулида қайта ишлаш, тайёр маҳсулотни қадоқлаш ва “Made in Uzbekistan” бренди остида хорижий бозорларга экспорт қилиш режалаштирилган.
Томонлар лойиҳани амалга ошириш учун зарур инфратузилмани шакллантириш ва ташкилий ишларни йўлга қўйиш бўйича кейинги қадамларни ҳам белгилаб олди.
