Ин ташаббус пас аз он пешниҳод гардид, ки Кумитаи рақобат ҳангоми санҷиши 116 аксия дар 58 мағоза ва нуқтаи хизматрасонӣ 65 ҳолати вайронкуниро ошкор кард.
Ба иттилои ниҳод, вайронкуниҳо ба надодани ҷоизаҳои ваъдашуда, тағйир додани натиҷаҳои қуръакашиҳо, пешниҳоди маълумоти нодуруст дар бораи тахфифҳо ва мавҷудияти маҳдудиятҳое марбут буданд, ки дар реклама зикр нашудаанд.
Дар вилояти Андиҷон ширкати Water Life Mineral ба се иштирокчии аксияи «Орзу ушалсин» ҷоизаҳои ваъдашударо, ки арзиши умумии онҳо 60 миллион сӯмро ташкил медод, надод. Кумита нисбат ба ин ҳолат парванда боз карда, вайрон шудани ҳуқуқи истеъмолкунандагонро муайян намуд ва ба ширкат дастури ҳатмӣ дод.
Дар вилояти Намангон ширкати «Наманган автотеххизмат» бурди иштирокчии қуръакашии автомобили Chevrolet Cobalt-ро бекор карда, мошинро ба шахси дигар супурд.
Ширкат ин амалро бо он шарҳ дод, ки бинобар иштибоҳ дар рақами телефон натавонистааст бо ғолиби аввалия тамос гирад. Пас аз дахолати Кумита автомобил ба ғолиби қонунии қуръакашӣ баргардонида шуд.
Ҳангоми баргузории фурӯшҳои тахфифӣ низ қонуншиканиҳо ошкор гардиданд.
Дар мағозаи Baldini-и шаҳри Намангон тахфифи 50-фоиза эълон шуда буд, аммо дар рӯйи молҳо нархномаҳо мавҷуд набуданд.
Дар мағозаи IDEA-и шаҳри Бухоро ба харидорон тахфифҳои 20, 50 ва 60-фоиза пешниҳод карда мешуданд. Аммо ин тахфифҳо на ба арзиши пурраи мол, балки танҳо ба пардохтҳои моҳона ҳангоми харид бо усули пардохти қисмӣ дахл доштанд.
Дар вилояти Самарқанд ширкати «Самарканд автотеххизмат» ба харидорони автомобилҳои Chevrolet ваъда дода буд, ки асбобу анҷоми рӯзгорро ҳамчун туҳфа пешниҳод мекунад. Аммо аз ин пешниҳод танҳо онҳое истифода бурда метавонистанд, ки арзиши автомобилро якбора ва пурра пардохт мекарданд.
Харидороне, ки пардохти қисмиро интихоб карда буданд, инчунин шахсони ҳуқуқӣ аз шумораи иштирокчиёни аксия хориҷ карда шуданд.
Кумита вайрон шудани талаботи қонунгузорӣ дар бораи реклама, қоидаҳои савдои чакана ва ҳифзи ҳуқуқи истеъмолкунандагонро ошкор намуда, ба ширкат дастури ҳатмӣ дод.
Дар вилояти Қашқадарё низ нисбат ба рекламаи аксияҳои IDEA оид ба фурӯши смартфонҳо бо пардохти қисмӣ эродҳо ба миён омаданд.
Дар эълонҳо шумораи молҳои ба аксия дохилшуда, нархи ҳадди ақали онҳо дар 30 рӯзи қаблӣ ва инчунин моли мушаххасе, ки харидор метавонист дар доираи пешниҳоди «1+1» ба даст орад, нишон дода нашуда буд.
Тибқи иттилои Кумитаи рақобат, аз 65 ҳолати вайронкунии ошкоршуда 59 ҳолат ё 90,7 фоиз пас аз шарҳу тавзеҳот ва огоҳӣ бартараф карда шудааст.
Нисбат ба чор ширкат парванда оғоз гардидааст. Дар натиҷаи бозҳисобкунӣ ба нафъи харидорон тақрибан 250 миллион сӯм баргардонида шудааст.
Бо мақсади тақвияти назорат ниҳод пешниҳодҳоро оид ба ҷорӣ намудани воситаҳои рақамии санҷиши аксияҳо ва тахфифҳо таҳия мекунад.
Аз ҷумла, пешниҳод шудааст, ки ба харидорон имкони скан кардани рамзи QR дар назди мол дода шавад, то онҳо тавонанд нархи пешинаи онро фаҳманд ва санҷанд, ки арзиши мол воқеан то чӣ андоза коҳиш ёфтааст.
Ҳамчунин ба нақша гирифта шудааст, ки ширкатҳо вазифадор карда шаванд, ки шартҳои аксияҳоро пешакӣ дар низоми махсуси электронии бақайдгирӣ сабт намуда, таърихи рақамии тағйирёбии нархҳоро пеш баранд.
Ин воситаҳо имкон медиҳанд, ки ваъдаҳои рекламавӣ бо шартҳои воқеии фурӯш муқоиса карда шуда, ҳолатҳое ошкор гарданд, ки тахфифҳои эълоншуда ба коҳиши воқеии нархи мол мувофиқат намекунанд.
Дар айни замон ин пешниҳодҳо дар марҳилаи таҳия қарор дошта, ҳанӯз мавриди амал қарор дода нашудаанд.
