El-Nino hodisasining Markaziy Osiyo va xususan O‘zbekistonning iqlim va ob-havo sharoitiga ta’siri tropik mintaqalardagi kabi yaqqol ifodalanmaydi, deb yozadi O‘zgidromet boshqarma boshlig‘i A.Narzullaev.
Mutaxassisning fikricha, avvalgi El-Nino davrlaridagi ob-havo sharoitlarining tahlili iqlim me’yorlaridan quyidagi og‘ishlarini ko‘rsatadi.
El-Nino Yer atmosferasiga juda katta miqdorda issiqlik energiyasini chiqargani sababli, u global o‘rtacha haroratni ko‘taradi.
Qish oyları uchun bu (ko‘p yillik meteorologik kuzatuvlar statistikasi buni tasdiqlaydi) El-Nino faolligi yillarida Markaziy Osiyoda qish ko‘proq iqlim me’yoridan iliqroq bo‘lishini anglatadi.
El-Nino kuchli Sibir havo oqimlarining kirib kelishi traektoriyasini bloklaydi yoki o‘zgartiradi, bu odatda mintaqaga ekstremal sovuqlarni (-20 °C dan past) olib keladi. Qishda, kunduzgi harorat musbat bo‘lgan davrlar ustunlik qiladi. Barqaror sovuq ob-havo o‘rniga uzoq davom etadigan bulutli va nam havo kuzatiladi.
Yoz faslida termik kirib kelish jarayonlarining kuchayishi Eron, Pokiston va Arabiston yarim orolidan jazirama issiq havo oqimlarining tez-tez va davomli kirib kelishiga sabab bo‘ladi. Kuchli El-Nino davrlarida O‘zbekistonda yoz faslidagi issiq ko‘pincha +40...+42°, shimoli-g‘arbiy, cho‘l va janubiy hududlarda +43...+48° belgisidan oshadi.
"El-Nino hodisasining ta’siri nafaqat ushbu fenomenning mavjudligiga, balki uning jadalligi (kuchi), davomiyligi va rivojlanishning avj pallasi (kulminatsiyasi) to‘g‘ri keladigan yil fasliga ham bog‘liqdir — bu omillarni oldindan prognoz qilish juda qiyin bo‘lib, ular ushbu fenomen namoyon bo‘lishining geografiyasini butunlay o‘zgartirib yuborishi mumkin", deb yozadi mutaxassis.
